Kryeministri sllovak Robert Fico tha se, megjithëse e dënon dhe e refuzon kategorikisht veprimin ushtarak amerikan kundër Venezuelës që çoi në kapjen e presidentit Nicolas Maduro, ai i njeh merita presidentit amerikan Donald Trump për faktin se e ka thënë hapur motivin e vërtetë të Washingtonit, pa u justifikuar me demokracinë apo të drejtat e njeriut, raportoi agjencia shtetërore TASR, transmeton Anadolu.

Fico tha të dielën se Trump “nuk e justifikoi në mënyrë të rreme vendimin e tij me nevojën për të përhapur demokracinë apo për të mbrojtur të drejtat e njeriut”.

Ai shtoi se lideri amerikan ka folur hapur për kontrollin mbi naftën venezuelase dhe hyrjen e kompanive amerikane në sektorin e naftës së vendit.

Fico tha se paqja duhet të mbetet parimi udhëheqës i qeverisë së tij, duke theksuar se Sllovakia nuk do të përfshihet në asnjë “aventurë ushtarake”.

Ai theksoi se fuqitë e mëdha po veprojnë gjithnjë e më shumë pa marrë parasysh të drejtën ndërkombëtare, duke paralajmëruar se institucionet globale janë dobësuar.

Ai tha se OKB-ja është “në gjunjë”, ndërsa Këshilli i Sigurimit, pa reformë dhe pa kompetenca më të forta, është bërë “i pafuqishëm”.

Duke iu referuar tensioneve mes SHBA-së dhe Venezuelës, Fico tha se vende të vogla si Sllovakia kanë ndikim të kufizuar, por megjithatë mbajnë përgjegjësi të shprehen.

“Megjithatë, do të dukesha qesharak dhe i pabesueshëm nëse, pasi kemi tërhequr trupat nga Iraku, kemi vënë veton ndaj kuotave të detyrueshme, kemi refuzuar një hua lufte për Ukrainën dhe kemi thënë në mënyrë të përsëritur që përdorimi i forcës ushtarake ruse në Ukrainë është shkelje e së drejtës ndërkombëtare, të qëndroja me qëllim i heshtur në rastin e Venezuelës”, tha ai.

Fico pranoi se qëndrimi i tij mund të tendosë përkohësisht marrëdhëniet sllovako-amerikane, veçanërisht tani që Bratisllava dhe Washingtoni po përgatisin një marrëveshje ndërqeveritare për bashkëpunim bërthamor, të lidhur me planet për një njësi të re bërthamore në Jaslovske Bohunice.

“Nuk kam rrugëdalje tjetër këtu. Nëse presidenti amerikan ka deklaruar pa hezitim se çfarë dëshiron në Venezuelë, atëherë si kryeministër i një vendi sovran që respekton të drejtën ndërkombëtare, unë kam detyrim ta shpreh hapur mendimin tim”, shtoi ai.