Kryeministri polak Donald Tusk ka deklaruar se situata në Lindjen e Mesme nuk ka gjasa të stabilizohet në ditët në vijim, duke iu referuar informacionit nga aleatët teksa tensionet po rriten pas sulmeve të SHBA-së dhe Izraelit ndaj Iranit, transmeton Anadolu.

“Për disa dhjetëra orë kam pasur arsye të besoj, bazuar në informacionin që kemi marrë nga aleatët tanë, se është e vështirë të pritet stabilizim në Lindjen e Mesme në ditët e ardhshme”, u tha Tusk gazetarëve në Varshavë.

“Kjo mund të çojë madje edhe në përshkallëzim të situatës. Nuk mund të presim një përmirësim të ndjeshëm në tregun e naftës”, shtoi ai. Zyrtarët polakë nuk kanë dhënë publikisht detaje mbi inteligjencën që qëndron pas vlerësimit të kryeministrit Tusk, por referimi i tij ndaj informacionit të aleatëve sugjeron koordinim brenda strukturave të sigurisë së NATO-s dhe BE-së.

Këto komente vijnë në një kohë kur luftimet midis Iranit dhe një koalicioni SHBA-Izrael po intensifikohen, duke ngritur shqetësime në Varshavë dhe më gjerë për një përshkallëzim rajonal dhe pasoja më të gjera globale. Së fundmi, Tusk ka paralajmëruar vazhdimisht se konflikti mund të zgjerohet përtej një operacioni të kufizuar ushtarak.

Në deklarata të mëparshme, të cituara nga transmetuesi polak "Radio Zet", Tusk tha se përballja midis Izraelit dhe Iranit po “shkon drejt një lufte të rregullt në rajon që mund të destabilizojë gjithë botën” dhe paralajmëroi se situata është më e rrezikshmja që nga Lufta e Dytë Botërore.

Autoritetet polake kanë monitoruar nga afër zhvillimet që nga sulmet e para ndërsa Tusk tha se ka marrë vazhdimisht informime nga ministritë e mbrojtjes dhe të jashtme. Varshava ka ndërmarrë hapa paraprakë në përgjigje të konfliktit, përfshirë thirrjen për qytetarët polakë që të largohen nga Irani dhe të shmangin udhëtimet në rajon.

“Ju lutemi largohuni menjëherë nga Irani”, tha më parë Tusk duke paralajmëruar se mundësia e një konflikti të nxehtë është shumë reale dhe se evakuimi mund të bëhet shpejt i pamundur.

Qeveria ka nisur përpjekje për evakuimin e shtetasve polakë në gjithë Lindjen e Mesme, duke e përshkruar situatën si me karakter lufte dhe që kërkon mobilizim të plotë të shërbimeve diplomatike. Komentet e fundit të Tuskut pasqyrojnë pasigurinë në rritje në Evropë mbi shkallën dhe kohëzgjatjen e luftës SHBA-Izrael kundër Iranit.

Teksa presidenti amerikan Donald Trump ka sugjeruar se sulmet mund të jenë të kufizuara, liderët evropianë duken gjithnjë e më të shqetësuar se konflikti mund të përshkallëzohet në një luftë më të gjerë rajonale që përfshin shumë aktorë.

Polonia, një anëtare kyçe e NATO-s në krahun lindor të aleancës, ka marrë rol gjithnjë e më aktiv në reagimin ndaj krizave globale të sigurisë që nga konflikti i Rusisë me Ukrainën. Varshava ka rritur ndjeshëm shpenzimet për mbrojtje dhe është pozicionuar si një qendër e rëndësishme logjistike dhe politike për operacionet e NATO-s në Evropë.

Tusk ka theksuar se koordinimi me aleatët mbetet thelbësor në menaxhimin e pasojave të konfliktit në Lindjen e Mesme, duke paralajmëruar se përshkallëzimi i mëtejshëm mund të ketë implikime të drejtpërdrejta për sigurinë evropiane.