RAMALLAH (AA) - Kryeministri palestinez Mohammad Mustafa diskutoi për "ndërmarrjen e hapave praktikë drejt njohjes së shtetit të Palestinës" me Sekretarin e Jashtëm britanik David Lammy dhe ka shprehur kënaqësinë e tij për qëllimin e Mbretërisë së Bashkuar për të njohur shtetin e Palestinës, transmeton Anadolu.

Sipas një deklarate nga Ministria e Punëve të Jashtme të Palestinës, Mustafa dhe Lammy u takuan në selinë e Kombeve të Bashkuara (OKB) në New York si pjesë e Konferencës Ndërkombëtare të Nivelit të Lartë mbi një zgjidhje paqësore të çështjes palestineze dhe zbatimin e një zgjidhjeje me dy shtete.

Mustafa dhe Lammy diskutuan për "zbatimin e hapave praktikë sipas një kalendari, drejt njohjes dhe përfaqësimit të shtetit të Palestinës edhe nga Mbretëria e Bashkuar por edhe nga më shumë vende".

Duke theksuar rëndësinë e njohjes së shtetit të Palestinës nga Mbretëria e Bashkuar, Mustafa theksoi se kjo do të mbrojë zgjidhjen me dy shtete, të cilën Izraeli po përpiqet ta shkatërrojë me të gjitha mjetet.

Mustafa përshkroi politikat gjenocidale dhe të urisë së Izraelit në Gaza, si dhe sulmet e kryera nga ushtria izraelite dhe izraelitët që kanë uzurpuar tokat palestineze në Bregun Perëndimor dhe Kudsin e pushtuar, dhe planet e tyre për aneksim dhe zhvendosje të detyruar.

Kryeministri palestinez Mustafa shprehu kënaqësinë e tij me njoftimin e Mbretërisë së Bashkuar se në shtator do ta njohë shtetin e Palestinës nëse Izraeli nuk ndërmerr hapa konkretë.

Mustafa falënderoi Sekretarin e Jashtëm britanik Lammy për ndihmën humanitare të Mbretërisë së Bashkuar në Gaza dhe për presionin që ushtroi për hapjen e pikave kufitare të Gazës.

- Britania njoftoi se do të njohë Palestinën në shtator nëse Izraeli nuk ndërmerr hapa konkretë

Pas një takimi të kabinetit mbi Gazën, kryeministri britanik Starmer njoftoi se vendi i tij do ta njohë shtetin e Palestinës në Asamblenë e Përgjithshme të OKB-së në shtator nëse Izraeli nuk përmbush disa kushte.

"Mund të konfirmoj se Mbretëria e Bashkuar do ta njohë shtetin e Palestinës në Asamblenë e Përgjithshme të OKB-së në shtator, përveç nëse qeveria izraelite ndërmerr hapa konkretë për t'i dhënë fund situatës së tmerrshme në Gaza, për të pranuar armëpushim dhe për të ringjallur mundësinë e zgjidhjes me dy shtete, duke u zotuar për paqe të qëndrueshme afatgjate", tha Starmer.