Kryeministri libanez Nawaf Salam tha sot se qeveria e tij ka ndaluar aktivitetet ushtarake dhe të sigurisë të Hezbollahut dhe ka kufizuar rolin e grupit në punë politike, duke urdhëruar ushtrinë të zbatojë një plan për të kufizuar armët nën kontrollin shtetëror në veri të lumit Litani, transmeton Anadolu.

"Shteti hedh poshtë çdo veprim ushtarak ose të sigurisë të nisur nga territori libanez", tha Salam në një konferencë për mediat pas një takimi të kabinetit në pallatin presidencial në lindje të Bejrutit, të kryesuar nga presidenti Joseph Aoun.

Ai tha se kabineti vendosi të ndalojë çdo operacion ushtarak jashtë "institucioneve legjitime shtetërore".

"Vendimi për luftë dhe paqe i takon ekskluzivisht shtetit", theksoi ai.

Salam tha se ky veprim kërkon kufizimin e aktiviteteve të Hezbollahut dhe detyrimin e grupit të dorëzojë armët e tij, duke i përshkruar veprimet e tij të fundit si "shkelje të vendimeve të kabinetit".

Ai udhëzoi komandën e ushtrisë libaneze të zbatojë me vendosmëri planin e qeverisë, veçanërisht dispozitën që synon kufizimin e armëve në veri të lumit Litani.

Hezbollahu tha herët sot se kishte shënjestruar një vendndodhje ushtarake në Izraelin verior me një breshëri raketash dhe dronësh, në përgjigje të sulmeve të vazhdueshme izraelite ndaj Libanit dhe një fushate të përbashkët ushtarake SHBA-Izrael kundër Iranit.

Sipas Ministrisë libaneze të Shëndetësisë, Izraeli nisi një seri sulmesh ajrore në periferitë jugore të Bejrutit dhe në Libanin jugor, duke vrarë të paktën 31 persona dhe duke plagosur 149 të tjerë.