Kryeministri izraelit, Benjamin Netanyahu do të mbajë një takim të martën për të diskutuar një aneksim të mundshëm të Bregut Perëndimor të pushtuar, thanë mediat lokale, transmeton Anadolu.

E përditshmja "Yedioth Ahronoth" tha se takimi i planifikuar do të jetë i dyti brenda dy javësh, pasi u mbajt një seancë ministrore për të shqyrtuar mënyrat e aneksimit të territorit.

Lëvizja "vjen në sfondin e presionit diplomatik për njohjen e një shteti palestinez", tha gazeta.

Disa vende, përfshirë Belgjikën, Francën, Mbretërinë e Bashkuar, Kanadanë dhe Australinë, njoftuan plane për të njohur shtetësinë palestineze gjatë takimeve të Asamblesë së Përgjithshme të OKB-së më 8-23 shtator, duke u bashkuar me 147 kombe që tashmë e bëjnë këtë.

Javën e kaluar, agjencia izraelite e lajmeve "Walla", duke cituar burime të njohura me çështjen, tha se ministri i Jashtëm izraelit, Gideon Saar, i tha sekretarit të Shtetit të SHBA-së, Marco Rubio, se Izraeli po përgatitej të aneksonte Bregun Perëndimor në muajt e ardhshëm.

Sipas gazetës "Haaretz", Kabinetit izraelit të Sigurisë iu kërkua nga Netanyahu të dielën të diskutonte përgjigjen e Izraelit ndaj njohjes së planifikuar të një shteti palestinez "përmes presionit për aneksimin e Bregut Perëndimor".

Më 20 gusht, Izraeli miratoi një projekt të madh vendbanimesh, të quajtur "E1", i cili synon të ndajë Bregun Perëndimor të pushtuar në dy pjesë, duke i ndarë qytetet veriore të Ramallahut dhe Nablusit nga Betlehemi dhe Hebroni në jug dhe duke izoluar Kudsin Lindor.

Komuniteti ndërkombëtar, përfshirë OKB-në, i konsideron vendbanimet izraelite të paligjshme sipas ligjit ndërkombëtar. OKB-ja ka paralajmëruar vazhdimisht se zgjerimi i vazhdueshëm i vendbanimeve kërcënon qëndrueshmërinë e zgjidhjes me dy shtete, një kornizë që shihet si çelësi për zgjidhjen e konfliktit palestinezo-izraelit prej dekadash.

Që nga fillimi i luftës gjenocidale të Izraelit në Rripin e Gazës në tetor 2023, të paktën 1.016 palestinezë janë vrarë dhe më shumë se 7.000 të tjerë janë plagosur në Bregun Perëndimor nga forcat izraelite dhe kolonët e paligjshëm, sipas Ministrisë së Shëndetësisë.

Në një mendim këshillimor korrikun e kaluar, Gjykata Ndërkombëtare e Drejtësisë e shpalli të paligjshëm pushtimin e territorit palestinez nga Izraeli dhe bëri thirrje për evakuimin e të gjitha vendbanimeve në Bregun Perëndimor dhe Kudsin Lindor.