ANKARA (AA) - Kryeministri i Indisë, Narendra Modi deklaroi se "Situata humanitare në Gaza është një çështje shqetësuese", transmeton Anadolu.

Sipas "ANI News", Modi foli në Samitin e 17-të të Liderëve të BRICS-it të organizuar nga Brazili në Rio de Janeiro.

Duke bërë thirrje për reforma të institucioneve globale, Modi tha se ka shumë konflikte në botë nga Azia Perëndimore në Evropë, veçanërisht në Gaza.

"Situata humanitare në Gaza është një çështje shqetësuese. India beson se paqja është e vetmja rrugë për mirëqenien e njerëzimit, pavarësisht se sa të vështira janë kushtet", tha Modi.

Ai theksoi se "terrorizmi është një nga sfidat më serioze në mjedisin global". Modi kujtoi sulmin terrorist në Pahalgam më 22 prill dhe tha: "Dënimi i terrorizmit nuk është vetëm çështje komoditeti, por duhet të jetë parimi ynë".

Modi bëri thirrje për veprime kundër terrorizmit me hapa të tillë si vendosja e sanksioneve, duke thënë se konfliktet duhet të zgjidhen përmes bashkëpunimit, dialogut dhe koordinimit dhe se BRICS-i ka rol të rëndësishëm në këtë drejtim.

- Deklarata e përbashkët e BRICS-it bën thirrje për armëpushim në Gaza

Një deklaratë e përbashkët u lëshua dje në kuadër të Samitit të Liderëve të BRICS-it të organizuar nga Brazili në Rio de Janeiro.

"Rripi i Gazës ishte 'pjesë e domosdoshme' e Palestinës. Bëjmë thirrje për tërheqjen e plotë të forcave izraelite nga Rripi i Gazës dhe të gjitha territoret e pushtuara palestineze si dhe një armëpushim të përhershëm dhe pa kushte në Gaza", thuhet në deklaratë.

BRICS, themeluesit e të cilit janë Brazili, Rusia, India, Kina dhe Afrika e Jugut, ka një vend të rëndësishëm në ekonominë botërore.