Kryeministri i Finlandës jep dorëheqje për mosmarrëveshjet rreth shërbimit postar
Antti Rinne ia ofroi dorëheqjen presidentit Sauli Niinisto, si rezultat i krizës së krijuar me grevën e punonjësve të shërbimit postar
Helsinki
Kryeministri i Finlandës sot dha dorëheqje pasi partneri kryesor i koalicionit tërhoqi mbështetjen nga kabineti i tij pesë-partiak, transmeton Anadolu Agency (AA).
Antti Rinne, i cili mori detyrën në qershor, është përballur me kritika të ashpra gjatë disa ditëve të kaluara për mënyrën se si ai dhe një anëtar i partisë së tij përgjegjëse për kompanitë qeveritare u morën me shërbimin postar shtetëror të Finlandës, "Posti", punëtorët e së cilës shkuan në grevë dyjavore në nëntor.
Njoftimi shkaktoi dorëheqjen zyrtare të kabinetit të përbërë nga Partia Social Demokratike e Rinne, Partia e Qendrës, të Gjelbrit, Aleanca e Majtë dhe Partia Popullore Suedeze e Finlandës.
Parlamenti do të vendosë për kryeministërin e ri javën e ardhshme.
Koalicioni qeverisës kishte kërkuar që Rinne të shpjegojë deklaratat dhe veprimet e qeverisë, por njëri nga partnerët kryesor të koalicionit, Partia e Qendrës, kishte deklaruar se shpjegimet nuk ishin të pranueshme, duke shprehur një mungesë besimi për Rinne dhe duke i kërkuar atij ose të jepte dorëheqjen, ose të kërkonte votëbesimin e deputetëve.
Rinne ofroi dorëheqjen e tij presidentit finlandez Sauli Niinisto, i cili i tha 57-vjeçarit Social Demokrat: "Faleminderit për momentet e shkurtra, por të shumta të bashkëpunimit të mirë".
Partia e Qendrës tërhoqi mbështetjen e saj për Rinne të hënën, por premtoi mbështetjen e saj të vazhdueshme për programet qeveritare, duke shmangur kështu zgjedhjet e parakohshme.
Greva dyjavore nga punonjësit e postës së Finlandës përfundoi më 27 nëntor pas arritjes së marrëveshjes për pagat. Sindikata që përfaqësonte punonjësit e Postit tha që ishte e kënaqur me marrëveshjen e arritur për kontratat e punës të rreth 700 punonjës të paketave.
Greva kishte çuar në një grevë tjetër njëditore mbështetëse nga sektori i transportit të vendit nordik, për të përkrahur punonjësit e postës, duke nxitur aviokompaninë kryesore Finnair të anulonte pothuajse 300 fluturime dhe duke i shkatuar probleme biznesit në kryeqytet.
Dorëheqja vjen në kohën kur Finlanda mban presidencën e radhës së Bashkimit Evropian.
Në ueb-faqen e Anadolu Agency mbi sistemin rrjedhës të lajmeve të AA një pjesë e lajmeve të ofruara ndaj abonentëve publikohen duke u përmbledhur. Për abonim ju lutemi na kontaktoni.