Kryeministri holandez Dick Schoof njoftoi se ka dhënë dorëheqje pasi Partia e Lirisë (PVV) e ekstremit të djathtë u tërhoq nga koalicioni dhe se do t'ia paraqesë dorëheqjen e qeverisë mbretit holandez Willem Alexander, transmeton Anadolu.

Schoof informoi për dorëheqjen e tij në një konferencë për media pas mbledhjes së jashtëzakonshme të kabinetit të mbajtur për shkak të tërheqjes së PVV nga qeveria, duke thënë "Kemi arritur në përfundimin se nuk ka mbështetje të mjaftueshme në parlament".

Ai vuri në dukje përgjegjësinë e PVV-së dhe udhëheqësit të saj Geert Wilders për rrëzimin e qeverisë duke thënë: "Nuk mund të vazhdoni së bashku nëse në një parti nuk ka vullnet".

Schoof e përshkroi vendimin e Wilders-it si "të panevojshëm dhe të papërgjegjshëm".

Në një deklaratë për gazetarët kryeministri Schoof tha: "Sigurisht që ndiheni përgjegjës kur përballeni me një situatë të tillë. Kam qenë në kontakt të ngushtë me udhëheqësit e të katër partive në koalicion ditët e fundit dhe nga pikëpamja ime e kam bërë të qartë se nuk është e nevojshme që kjo të jetë kështu".

- Në nëntor priten zgjedhje të reja

Schoof, i cili deklaroi se rikrijimi i qeverisë nuk është e mundur të rivendoset, njoftoi se zgjedhjet e reja ndoshta do të mbahen në nëntor.

Lidhur me problemet kryesore të vendit, siç janë kriza e strehimit, ekonomia, siguria dhe çështjet e imigracionit, Schoof tha se "Ne do të bëjmë gjithçka për të marrë vendimet e nevojshme dhe do të kërkojmë shumicën e nevojshme brenda fushëveprimit të fushës që na është dhënë nga Parlamenti".

- Qeveria e përkohshme do të kryejë detyrën deri në formimin e qeverisë së re

Schoof tha se ministrat nga Partia Popullore për Liri dhe Demokraci (VVD), Partia e Kontratës së Re Sociale (NSC) dhe Partia e Lëvizjes së Qytetarëve Fermerë (BBB) do të vazhdojnë detyrat e tyre deri në formimin e qeverisë së re dhe tha "Është e rëndësishme që ministrat të vazhdojnë detyrat e tyre pa u lodhur gjatë kësaj periudhe ku përjetohen tensione gjeopolitike, paqartësi të sigurisë, diskutime për tarifat e importit dhe çështje kombëtare".

Partia e Lirisë (PVV), e cila është tërhequr nga qeveria, nuk pritet të marrë pjesë në qeverinë e përkohshme ndërsa parashikohet që partitë e tjera në koalicion do të kryejnë emërime të përkohshme në ministritë e lëna të lira nga PVV.

Qeveria do të vazhdojë të funksionojë përkohësisht pa PVV-në.