Ministri i Punëve të Jashtme i Rusisë, Sergey Lavrov, ka deklaruar se NATO e ka bërë të qartë se do të refuzojë propozimin e Moskës për shpalljen e një moratoriumi për vendosjen e raketave bërthamore me rreze të mesme, raporton Anadolu Agency (AA).

Presidenti rus, Vladimir Putin, më herët ka propozuar një moratorium për vendosjen e shtabeve bërthamore në Evropë dhe rajone të tjera.

Duke folur në një konferencë në Moskë, Lavrov tha se Moska ka kërkuar nga SHBA-të të deklarojnë një moratorium për vendosjen e këtyre raketave, pasi Washingtoni në muajin gusht u tërhoq zyrtarisht nga Traktati i Forcave Bërthamore me rreze të mesme (INF).

“Presidenti Putin në mesazhet personale dërguar drejtuesve të vendeve anëtare të NATO-s dhe vendeve të rajonit u bëri thirrje për vendosjen e pajisjeve me bazë tokësore INF. Një përgjigje e qartë nga Aleanca nuk pasoi. Për më shumë, na jepet të kuptojmë se NATO nuk do të punojë për atë”, tha Lavrov.

Më 2 gusht, SHBA u tërhoq zyrtarisht nga Traktati INF. Më vonë, në të njëjtin muaj, SHBA testoi një raketë, e ndaluar më parë sipas traktatit.

Traktati u nënshkrua në vitin 1987 nga lideri i atëhershëm sovjetik, Mikhail Gorbachev dhe presidenti i SHBA-ve, Ronald Reagen, duke reduktuar mundësitë për një luftë bërthamore në Evropë.

Sipas traktatit, të dy palët shkatërruan tërë klasën e raketave me rreze të mesme dhe të shkurtër në një periudhë prej katër vitesh.

Vëzhguesit ndërkombëtarë shprehin frikë të një gare të re armësh në mungesë të këtij traktati historik.