Ministri i Jashtëm i Çekisë, Petr Macinka tha se bota po lëviz drejt një zgjidhjeje diplomatike për luftën në Ukrainë, një kurs i mbështetur edhe nga qeveria çeke, transmeton Anadolu.

Duke folur për agjencinë çeke të lajmeve të hënën, Macinka tha se zhvillimet e fundit tregojnë përparim drejt negociatave, duke shtuar se Ukraina ka bërë lëshime të rëndësishme ditët e fundit dhe hapi tjetër tani i takon Rusisë.

"Jam i kënaqur që bota më në fund po lëviz drejt një zgjidhjeje diplomatike, të cilën e mbështet edhe qeveria çeke", tha Macinka duke argumentuar se presidenti i SHBA-së, Donald Trump e ka pozicionuar veten si një ndërmjetës kyç i aftë për të sjellë të dyja palët në tryezën e negociatave.

Megjithatë, ai paralajmëroi se përparimi do të kërkojë qasje konstruktive nga të gjitha palët, duke thënë se durimi i Trumpit "nuk është i pafund". Macinka shtoi se garancitë e forta dhe realiste të sigurisë perëndimore mund t'i ofrojnë Ukrainës alternativë efektive ndaj anëtarësimit në NATO dhe të ndihmojnë në parandalimin e një përsëritjeje të luftës së Rusisë.

Komentet pasuan bisedimet midis presidentit ukrainas, Volodymyr Zelenskyy dhe Trumpit në SHBA të dielën. Trumpi e përshkroi takimin si "të mrekullueshëm", duke thënë se vetëm një ose dy pika ngërçi mbeten në rrugën drejt një marrëveshjeje paqeje.

Kryetari i Komitetit të punëve të jashtme të Parlamentit çek, Radek Vondracek tha se ka "shpresë të vërtetë për paqe të vërtetë", duke lavdëruar përpjekjet e Trumpit për t'i dhënë fund konfliktit. Duke shkruar në kompaninë amerikane të mediave sociale X, Vondracek tha se presidenti amerikan po "negocion pa u lodhur" për t'i dhënë fund luftës.

Trumpi ka thënë se çështjet territoriale mbeten ndër elementët më të diskutueshëm të bisedimeve, përfshirë kërkesën e Rusisë që Ukraina të heqë dorë nga i gjithë rajoni i Donbasit, madje edhe nga zonat që Moska nuk i ka pushtuar plotësisht ushtarakisht.

Zelenskyy ka thënë se plani i propozuar i paqes përfshin garancitë e sigurisë së SHBA-së për Ukrainën për një periudhë 15-vjeçare, me mundësinë e zgjatjes. Ai ka treguar se Kievi favorizon një marrëveshje më të gjerë të nënshkruar nga Ukraina, SHBA-ja, Rusia dhe partnerët evropianë.