Ministri i Punëve të Jashtme i Bjellorusisë, Maxim Ryzhenkov, ka bërë të ditur se presidenti Alexander Lukashenko ka udhëzuar zyrtarët që të hapin një ambasadë në Korenë e Veriut, transmeton Anadolu.

"Presidenti ka vendosur objektiva shumë konkrete. Hapjen e ambasadës sonë këtu si përgjigje ndaj ambasadës së Koresë së Veriut, e cila prej kohësh ekziston në Republikën e Bjellorusisë", tha Ryzhenkov.

Sipas agjencisë shtetërore e lajmeve Belta, Ryzhenkov tha se Lukashenko gjithashtu ka ngarkuar zyrtarët që të përshpejtojnë punën për një marrëveshje për udhëtim pa viza për qytetarët bjellorusë.

"Dhe, në përgjithësi, duke u mbështetur në Traktatin e Miqësisë dhe Bashkëpunimit tashmë të nënshkruar, ne do të shqyrtojmë të gjithë gamën e çështjeve që mund të adresojmë në një të ardhme shumë të afërt", tha ai, duke theksuar se fusha premtuese përfshijnë shëndetësinë, arsimin dhe bujqësinë.

Komentet e tij vijnë një ditë pasi Minsku dhe Pheniani nënshkruan një "traktat miqësie" gjatë vizitës së parë të Lukashenkos në Korenë e Veriut. Gjatë takimit me liderin e Koresë së Veriut, Kim Jong Un, presidenti bjellorus tha se marrëdhëniet mes dy vendeve po hyjnë në "një fazë thelbësisht të re".

Koreja e Veriut mban një ambasadë në Bjellorusi që nga viti 2016.