Presidenti i Këshillit Evropian, Antonio Costa ka thënë se diskutimet mbi përdorimin e aseteve të ngrira ruse të mbajtura në kompaninë e shërbimeve financiare me seli në Belgjikë, "Euroclear", nuk janë mosmarrëveshje midis bllokut dhe Belgjikës, duke shprehur besimin se një zgjidhje e përbashkët mund të arrihet në një samit të BE-së më vonë këtë javë, transmeton Anadolu.

"Kjo nuk është një luftë midis Evropës dhe Belgjikës. Ne po punojmë së bashku për një zgjidhje", tha Costa për transmetuesin belg "VRT NWS" në një intervistë. Asetet që i përkasin Bankës Qendrore të Rusisë janë ngrirë në "Euroclear" në Bruksel për gati katër vjet si pjesë e sanksioneve të BE-së të vendosura pas fillimit të luftës Moskë-Kiev në shkurt 2022.

Komisioni Evropian ka propozuar përdorimin e aseteve të bllokuara për t'i ofruar Ukrainës mbështetje shtesë financiare dhe ushtarake përmes kredive në vitet e ardhshme. Belgjika ka ngritur shqetësime në lidhje me planin, duke paralajmëruar për rreziqe të mundshme ligjore dhe financiare nëse Rusia do të kërkonte kthimin e aseteve.

Udhëheqësit e BE-së pritet ta diskutojnë çështjen në samitin e tyre në Bruksel të enjten, me bisedimet që mund të zgjasin deri të premten. Costa tha se kishte zgjedhur të fliste për median belge për të nënvizuar se institucionet e BE-së i kishin "dëgjuar dhe kuptuar" shqetësimet e Belgjikës dhe shtoi se bashkëpunimi me qeverinë belge kishte qenë konstruktiv.

Ai shprehu optimizëm se mund të arrihet marrëveshje, duke vënë në dukje se disa udhëheqës të BE-së preferojnë të mos vazhdojnë pa mbështetjen e Belgjikës, edhe pse një vendim teknikisht mund të miratohet me shumicë të kualifikuar.

"Disa kolegë kanë treguar se nuk duan të përdorin një shumicë të kualifikuar nëse Belgjika nuk përfshihet", tha Costa duke shtuar se përpjekjet janë duke vazhduar për të siguruar mbështetjen e Belgjikës.

Ai vlerësoi kryeministrin belg, Bart De Wever, duke thënë se ai kishte vepruar "në mënyrë të përgjegjshme dhe konstruktive" në diskutime. "Shqetësimet e tij janë legjitime", tha Costa, duke shtuar se De Wever nuk kishte bllokuar kurrë një vendim dhe kishte kërkuar vazhdimisht zgjidhje që balanconte interesat kombëtare dhe ato në të gjithë BE-në.

Costa e përshkroi përdorimin e propozuar të aseteve ruse si një "zgjidhje inteligjente", duke argumentuar se kjo do të shmangte ngarkimin e taksapaguesve të BE-së, buxheteve kombëtare ose borxhit publik.

"Shpresoj të gjejmë një zgjidhje me Belgjikën", tha presidenti i Këshillit Evropian.