Një familje palestineze mezi i ka shpëtuar vdekjes pasi kolonët ekstremistë izraelitë i vunë flakën shtëpisë së tyre në fshatin Susiya në jug të Hebronit në Bregun Perëndimor të pushtuar, raporton Anadolu.

Nasser Nawaj’ah, një banor palestinez, tha se një grup kolonësh sulmuan shtëpinë e tij në orën 1 të mëngjesit, duke i vënë flakën. Zjarri shkatërroi të gjithë strukturën, përfshirë mobiljet dhe sendet personale.

Nawaj’ah tha se ai, gruaja e tij dhe shtatë fëmijët e tyre ishin brenda shtëpisë në atë kohë dhe mezi i shpëtuan vdekjes. Ai raportoi se i pa sulmuesit duke ikur para se të përpiqeshin të shuanin flakët.

Nawaj’ah, një aktivist kundër kolonëve, theksoi një rritje të ndjeshme të sulmeve të kolonëve në të gjithë Bregun Perëndimor, veçanërisht në pjesën jugore, në kuadër të përpjekjeve izraelite për t’i larguar palestinezët nga toka e tyre.

Sipas Marrëveshjes së Oslos të vitit 1995, Bregu Perëndimor është i ndarë në Zonën A (të kontrolluar nga palestinezët), Zonën B (të kontrolluar bashkërisht) dhe Zonën C (të kontrolluar nga Izraeli).

Nawaj’ah argumentoi se dhuna në Zonën C, e cila është nën kontrollin e plotë të Izraelit, nuk kryhet vetëm nga kolonët, por mbështetet edhe nga shteti, duke i bërë shtëpitë palestineze të pasigurta.

Ndërkohë, krahas ofensivës ushtarake të Izraelit në Gaza, dhuna në Bregun Perëndimor është rritur ndjeshëm, me zyrtarët palestinezë që raportojnë të paktën 982 vdekje dhe 7 mijë të plagosur që nga tetori i vitit 2023.