Kina tha të martën se ka vendosur t'i ofrojë ndihmë humanitare emergjente Iranit, Jordanisë, Libanit dhe Irakut mes konfliktit të armatosur të vazhdueshëm në Lindjen e Mesme, pasi SHBA-ja dhe Izraeli kanë vazhduar sulmet e përbashkëta ndaj Teheranit që nga 28 shkurti, transmeton Anadolu.

Pekini "mbetet i përkushtuar ndaj vizionit të ndërtimit të një bashkësie të përbashkët humanizmi dhe shpirti humanitar", u tha gazetarëve në kryeqytetin kinez zëdhënësi i Ministrisë së Jashtme, Lin Jian.

"Konflikti i vazhdueshëm shkaktoi një katastrofë të tmerrshme humanitare popujve të vendeve në rajon, përfshirë Iranin. Kina shpreh keqardhje të thellë për popujt në vendet përkatëse dhe zemrat tona janë me ta", tha Lin.

"Kina vendosi t'i ofrojë ndihmë humanitare emergjente Iranit, Jordanisë, Libanit dhe Irakut me shpresën e lehtësimit të vështirësive humanitare me të cilat përballen njerëzit", shtoi Lin.

Javën e kaluar, Pekini tha se Shoqata e Kryqit të Kuq të Kinës do të ofrojë 200.000 dollarë ndihmë humanitare emergjente për Gjysmëhënën e Kuqe Iraniane për të “ngushëlluar” familjet e pikëlluara të mbi 165 nxënëseve të shkollës që u vranë në një sulm ajror në Shkollën Fillore Shajareh Tayyebeh në qytetin jugor iranian Minab më 28 shkurt, kur SHBA-ja dhe Izraeli filluan sulmet e tyre të përbashkëta.

Lin tha se Kina “do të vazhdojë të bëjë çmos për të nxitur paqen, për të punuar për rivendosjen e hershme të paqes dhe stabilitetit rajonal dhe për të parandaluar përhapjen e mëtejshme të krizës humanitare”.

Armiqësitë në rajon janë përshkallëzuar që kur Izraeli dhe SHBA-ja nisën sulme të përbashkëta ndaj Iranit, duke vrarë deri më tani rreth 1.300 njerëz, përfshirë Udhëheqësin Suprem të atëhershëm, Ajatollah Ali Khamenei.

Irani është hakmarrë me sulme me dronë dhe raketa që kanë shënjestruar Izraelin, Jordaninë, Irakun dhe vendet e Gjirit që strehojnë asete ushtarake amerikane, duke shkaktuar viktima dhe dëme në infrastrukturë dhe duke ndikuar në tregjet globale dhe aviacionin.