Kina dhe Koreja e Veriut rifilluan sot shërbimet ndërkufitare të trenave të pasagjerëve për herë të parë pas gjashtë vitesh, pasi linja u pezullua gjatë pandemisë së COVID-19, transmeton Anadolu.

Një tren ndërkombëtar pasagjerësh që lidh qytetin kinez Dandong në provincën Liaoning me kryeqytetin e Koresë së Veriut, Phenian, u nis në orën 10:00 nga Dandongu, njoftoi Agjencia Shtetërore e Lajmeve Xinhua të Kinës.

Treni është planifikuar të mbërrijë në Phenian në orën 18:07 ndërsa shërbimi do të operojë çdo ditë në të dy drejtimet. Shërbimet e pasagjerëve midis dy vendeve u pezulluan në janar 2020 për shkak të përhapjes së COVID-19.

Zëdhënësi i Ministrisë së Jashtme kineze, Guo Jiakun tha se mirëmbajtja e operacioneve të trenave është e rëndësishme për shkëmbimet midis njerëzve. Koreja e Veriut dhe Kina janë "fqinjë të ngushtë", tha Guo gjatë një konference për mediat.

"Kina mbështet autoritetet kompetente të dy vendeve në ruajtjen e komunikimit dhe ofrimin e kushteve më të favorshme për shkëmbimet midis njerëzve midis dy palëve", shtoi Guo.