STAMBOLL (AA) - Në Kenia vazhdojnë protestat të cilat filluan pas vdekjes së fenomenit të mediave sociale dhe blogerit, Albert Ojwang në paraburgim, transmeton Anadolu.

Sipas lajmeve në mediat lokale, një protestues u qëllua për vdekje nga policia gjatë demonstratave në kryeqytetin Nairobi. Protestuesi, identiteti i të cilit nuk u bë i ditur, u grind me dy oficerë policie me uniformë dhe u vra në vendngjarje kur një oficer policie i maskuar hapi zjarr.

Incidenti ndodhi gjatë ditës në një zonë ku ishin të pranishëm shumë gazetarë dhe protestues.

Në imazhet e shpërndara në mediat sociale lidhur me goditjen e protestuesit, shihen disa protestues që largojnë nga vendi i ngjarjes trupin e pajetë të personit që u qëllua dhe të protestuesve që brohoritën slogane kundër policisë duke mbajtur flamuj kenianë në duar.

Protestuesit vazhduan marshimin e tyre duke mbajtur pankarta me mbishkrimet "ndaloni vrasjet policore". Disa organizata dhe aktivistë të shoqërisë civile e dënuan incidentin dhe bënë thirrje për hetim të menjëhershëm të pavarur.

- Vdekja e Albert Ojwang

Mësuesi 31-vjeçar dhe influenceri i mediave sociale, Albert Ojwang u ndalua më 6 qershor pasi bëri postime kritike në platformën e mediave sociale në X kundër zv.drejtorit të përgjithshëm të Policisë së Kenias, Eliud Kipkoech Lagat.

Ojwang i cili u dërgua në Nairobi po atë ditë vdiq ndërsa ishte në paraburgim në stacionin qendror të policisë. Raporti i autopsisë përcaktoi se shkaku i vdekjes ishte trauma dhe ngushtimi në qafë, një gjetje kjo e cila ra në kundërshtim me deklaratat e policisë për "vdekje natyrale".

Incidenti shkaktoi reagime të gjera në vend ndërsa presidenti i Kenias, William Ruto e përshkroi vdekjen e Ojwang si "zemërthyese dhe të papranueshme" dhe urdhëroi hetim të shpejtë dhe transparent.

Organizatat e shoqërisë civile dhe kritikët theksuan se vazhdimi i qëndrimit të Lagat në detyrë mund të dëmtojë paanshmërinë e hetimit.

Në një deklaratë dje, Lagat tha dje se po tërhiqej përkohësisht nga posti i tij për të siguruar sigurinë e hetimit për vdekjen e Ojwang.