Kancelari gjerman, Friedrich Merz e shtyu udhëtimin e tij të sotëm në Norvegji për të udhëtuar në vend të kësaj në Bruksel për bisedime me kryeministrin belg Bart De Wever, transmeton Anadolu.

Një zëdhënës i qeverisë tha se kancelari Merz do të marrë pjesë në një takim me kryeministrin De Wever, por nuk dha detaje të mëtejshme. Ndryshimi në minutën e fundit vjen teksa Gjermania kërkon të sigurojë mbështetjen e Belgjikës për një plan të Bashkimit Evropian (BE) për të përdorur asetet e ngrira ruse për të mbështetur Ukrainën.

Merz për herë të parë e propozoi planin në muajin shtator, ndërsa presidentja e Komisionit të BE-së, Ursula von der Leyen, dha detaje për këtë plan në një konferencë për media të mërkurën. Plani synon rritjen e presionit ndaj Rusisë dhe krijimin e fondeve për ndihmë ushtarake për Ukrainën.

Sipas propozimit, Komisioni Evropian do të krijojë kredi dëmshpërblimi, duke përdorur bilancet e parave të gatshme nga asetet e palëvizshme ruse në BE. Kievi do të detyrohet ta shlyejë kredinë vetëm pasi Rusia të paguajë dëmshpërblimet e luftës.

Von der Leyen theksoi se paketa përfshin masa të gjera mbrojtëse për të mbrojtur vendet e BE-së dhe institucionet financiare nga hakmarrja e mundshme ruse ose veprimet e paligjshme të zbatimit në vendet e treta.

"Një mekanizëm solidariteti do t'i lejonte BE-së të përballonte në mënyrë kolektive çdo rrezik të mbetur", tha Von der Leyen.

Megjithatë, Belgjika ka ngritur shqetësime në lidhje me planin, duke pasur frikë se mund të përballet me sfida ligjore dhe të mbajë përgjegjësi financiare e vetme. Qeveria belge ka insistuar se të gjitha vendet anëtare të BE-së duhet të ndajnë si rreziqet financiare ashtu edhe ato ligjore.

Të mërkurën, ministri belg i Punëve të Jashtme, Maxime Prevot shprehu zhgënjim me propozimin e BE-së.

"Kemi ndjesinë frustruese se nuk po dëgjohemi. Shqetësimet tona po minimizohen. Teksti që Komisioni Evropian do të paraqesë sot nuk i adreson shqetësimet tona në mënyrë të kënaqshme", u tha Prevot gazetarëve.