Kanadaja nuk do të paguajë 1 miliard dollarë amerikanë për t'u bashkuar me "Bordin e Paqes" të SHBA-së, tha të martën ministri i financave i vendit, transmeton Anadolu.

Ministri Francois-Philippe Champagne theksoi se, megjithëse kuadri i bordit nuk është përfunduar, Kanadaja ka vendosur të ndalojë pagesën.

"Ka shumë detaje për t'u sqaruar, por një gjë është e qartë: Kanadaja nuk do të paguajë nëse do të bashkohet me Bordin e Paqes", tha Champagne për gazetarët në Davos, Zvicër, ku po merr pjesë në Forumin Ekonomik Botëror.

Kjo shënon një tërheqje nga pranimi i kryeministrit kanadez, Mark Carney, të hënën të një ftesë paraprake për bordin. Megjithatë, Kanadaja mund të bashkohet me Bordin e Paqes të administratës Trump nëse tarifa hiqet.

"Jemi ende në fazat e hershme për sa i përket termave të referencës së bordit dhe mënyrës së funksionimit të tij" raportoi "CBC News", duke cituar Champagne.

"Kryeministri do të marrë vendimin përfundimtar kur të njihen të gjitha faktet dhe të sqarohen të gjitha detajet - nëse kjo është në interesin më të mirë të Kanadasë", tha ai.

Carney tha se paratë janë të nevojshme për të mbështetur njerëzit në Rripin e Gazës.

"Kanadaja dëshiron që paratë të kenë ndikim maksimal", tha Carney për gazetarët duke shtuar: "Ende nuk kemi flukse të ndihmës humanitare pa pengesa në masë për popullsinë e Gazës".

Presidenti amerikan, Donald Trump, ka ftuar 60 liderë botërorë për t'u bashkuar me bordin.

Disa udhëheqës shprehin shqetësimin se Bordi i Paqes mund të trajtojë më shumë konflikte globale dhe mund të zëvendësojë potencialisht OKB-në.