Tajlanda dhe Kamboxhia zhvilluan sot bisedimet e tyre të para ushtarake në provincën Chanthaburi të Tajlandës mes përleshjeve të reja ndërsa numri i të vdekurve nga të dyja palët është në dhjetëra, sipas faqes së lajmeve "Thai Enquirer", transmeton Anadolu.

Takimi vjen si bisedimet e para ushtarake që nga fillimi i përleshjeve të përsëritura më 8 dhjetor. Deri më tani nuk ka pasur asnjë deklaratë zyrtare nga të dyja palët mbi takimin. Të dyja palët do të zhvillojnë negociata ushtarake deri të premten, sipas transmetuesit publik Thai PBS. Takimi i sotëm ka zgjatur më pak se një orë.

Zgjedhja e vendit u kundërshtua më parë nga Kamboxhia, e cila thuhet se donte të takohej në Malajzi, por kjo u refuzua nga Tajlanda. Tajlanda thuhet se më parë ishte gati të ngrinte çështjet e minave tokësore, vendeve historike, ndërtesave civile dhe komuniteteve që dyshohet se përdoren si pozicione ushtarake, tha media.

Të shtunën, një takim i Komitetit të përgjithshëm kufitar do të bashkëkryesohet nga dy ministrat e mbrojtjes pasi të përfundojnë takimet në nivel sekretariati. Nëse bisedimet nuk rezultojnë në marrëveshje mbi kornizat kryesore teknike, siç janë vendosja e trupave dhe masat specifike të nevojshme për të siguruar armëpushim, Bangkoku ka thënë se nuk do të vazhdojë me takimin dhe as nuk do të nënshkruajë ndonjë marrëveshje.

- Gati një milion të zhvendosur nga përleshjet

Ministria e Mbrojtjes e Kamboxhias tha se Tajlanda lëshoi dy predha në zonën e Poipet të mërkurën, duke shtuar se forcat më vonë hodhën një predhë në provincën Banteay Meanchey, duke plagosur dy civilë, sipas "Khmer Times".

Forcat tajlandeze hapën zjarr pranë tempullit Preah Vihear, tha ajo duke shtuar se forcat kamboxhiane hapën zjarr gjithashtu me raketa BM-21. Tajlanda tha të martën se trupat e saj shkatërruan dy ndërtesa në qytetin kufitar kamboxhian të Poipet, të cilat dyshohet se po përdoreshin për të strehuar mashtrues dhe për të ruajtur municione, sipas transmetuesit publik Thai PBS.

Forcat tajlandeze thanë se përleshjet vazhduan në tre pika përgjatë kufirit Sa Kaeo të mërkurën, sipas faqes së internetit të The Nation. Avionët luftarakë tajlandezë bombarduan provincën Banteay Meanchey dhe provincën Battambang të mërkurën, sipas "Khmer Times".

Një video nga pala kamboxhiane tregoi studentë në Battambang duke ikur në panik. Veçmas, Ushtria Mbretërore Tajlandeze tha sot në platformën sociale amerikane Facebook se një raport nga Kamboxhia që pretendon se Tajlanda ka kryer krime mjedisore ishte "shtrembërim serioz i fakteve".

Autoritetet tajlandeze thanë se në luftime janë vrarë 23 ushtarë tajlandezë dhe një civil, duke shtuar se 33 civilë të tjerë humbën jetën nga "efekte anësore të situatës". Ministria e Brendshme e Kamboxhias tha se 21 civilë kamboxhianë u vranë.

Gati një milion njerëz janë zhvendosur nga të dyja palët që nga fillimi i përleshjeve.