Japonia i ka bërë thirrje Izraelit që të ndalë menjëherë veprimet që minojnë zgjidhjen me dy shtete, duke shprehur "shqetësime serioze" lidhur me zgjerimin e vendbanimeve të paligjshme kolone në Bregun Perëndimor të pushtuar, njoftoi Ministria e Punëve të Jashtme e Japonisë, transmeton Anadolu.

Sipas ministrisë, mesazhi është përcjellë nga ministri i Jashtëm japonez, Toshimitsu Motegi, gjatë një takimi me homologun e tij izraelit, Gideon Sa’ar, në Tel Aviv të dielën.

Ndërsa Motegi e ka dënuar sulmin e Hamasit të 7 tetorit 2023, ai ka shprehur "shqetësim të thellë" për situatën humanitare në Gaza. Motegi i ka bërë thirrje Izraelit që të "ndërmarrë masa të përshtatshme për mbrojtjen e civilëve dhe garantimin e ndihmës humanitare në Gaza", thuhet në deklaratë.

Ai gjithashtu "kërkoi fuqishëm nga Izraeli të marrë masa të përshtatshme" për të siguruar ofrimin e pandërprerë të ndihmës humanitare nga organizatat ndërkombëtare, përfshirë agjencinë e OKB-së për refugjatët palestinezë (UNRWA) dhe organizata të tjera joqeveritare.

Sa i përket situatës në Bregun Perëndimor, Motegi i ka thënë homologut të tij se aktivitetet e vendbanimeve kolone shkelin të drejtën ndërkombëtare.

Duke shprehur "shqetësime serioze" se zgjerimi i vendbanimeve kolone dhe rritja e dhunës nga kolonët mund ta destabilizojnë më tej rajonin, ai i ka kërkuar Izraelit të “ndalë menjëherë çdo veprim të njëanshëm që bie ndesh me zgjidhjen me dy shtete”.

Japonia ka dërguar ambasadorin Takeshi Okubo dhe një specialist në Qendrën e Koordinimit Civilo-Ushtarak, të cilën Motegi e inspektoi gjithashtu gjatë vizitës. Qendra e udhëhequr nga SHBA-ja është themeluar për të monitoruar zbatimin e marrëveshjes së armëpushimit në Gaza dhe për të koordinuar ndihmën humanitare për enklavën palestineze.

- Dialogu politik i nivelit të lartë Japoni–Palestinë

Motegi më pas është takuar me kryeministrin palestinez Mohammad Mustafa në Bregun Perëndimor, njoftoi Ministria e Jashtme e Japonisë në një deklaratë të veçantë. Ai ka shpjeguar "mbështetjen e vazhdueshme" të Japonisë për zgjidhjen me dy shtete dhe qëndrimin e saj lidhur me rindërtimin e Gazës dhe ndërtimin e shtetit palestinez.

Motegi ka thënë se Japonia do të angazhohet "aktivisht" në përpjekjet ndërkombëtare për rindërtimin e Gazës nëpërmjet "përpjekjeve për ruajtjen e paqes".

Të dyja palët kanë rënë dakord të bashkëpunojnë për paqen dhe stabilitetin në Lindjen e Mesme dhe për krijimin e një dialogu politik të nivelit të lartë Japoni–Palestinë. Motegi ka vizituar gjithashtu kampin e refugjatëve Jalazone pranë Ramallahut.

Vizita kishte për qëllim "të kuptohet situata e refugjatëve palestinezë" në Bregun Perëndimor dhe të vëzhgohet nga afër mbështetja e Japonisë për përpjekjet për ndërtimin e shtetit palestinez. Gjatë turneut të tij në Lindjen e Mesme, Motegi do të udhëtojë në Doha për bisedime me homologun e tij nga Katari, përpara se të vizitojë Indinë dhe Filipinet.