RAMALLAH/ANKARA (AA) - Forcat izraelite dhe kolonët e paligjshëm filluan zhvendosjen me forcë të palestinezëve nga komuniteti beduin Arab al-Malihat në perëndim të Jerikos në Bregun Perëndimor të pushtuar për herë të dytë brenda një muaji, tha sot një zyrtar palestinez.

Kreu i Komisionit Rezistencës ndaj Kolonizimit dhe Murit i lidhur me Organizatën për Çlirimin e Palestinës (PLO), Muayyad Shaban tha për Anadolu se forcat pushtuese izraelite dhe kolonët e paligjshëm filluan operacionet e dëbimit kundër banorëve të Arab al-Malihatit në Jerikon lindore, duke sfiduar një vendim gjykate izraelite që lejonte komunitetin të jetonte në tokat e tyre.

Në një deklaratë, Shaban e dënoi këtë veprim si një "shkelje të qartë" të urdhrit të gjykatës. Ai shtoi se kolonët e paligjshëm kanë djegur shtëpi dhe prona dhe kanë sulmuar banorët vendas si dhe aktivistë të huaj.

Shaban paralajmëroi se zhvendosja me forcë e familjeve në Arab al-Malihat për herë të dytë brenda një muaji është pjesë e një plani më të gjerë të zgjerimit të vendbanimeve të paligjshme të ekzekutuar nga qeveria izraelite e udhëhequr nga ministri i Financave, Bezalel Smotrich dhe ministri i Sigurisë Kombëtare, Itamar Ben-Gvir.

Ai tha se plani synon të judaizojë zonën për shkak të vendndodhjes së saj strategjike si një rrugë kryesore midis Jerikos dhe rajoneve të tjera të Bregut Perëndimor. Zyrtari nënvizoi se zhvendosja u krye nën dhunën dhe terrorin e kolonëve të mbrojtur nga ushtria izraelite, me sulmet ndaj komunitetit që janë përshkallëzuar në javët e fundit.

Të enjten, palestinezët rindërtuan komunitetin pasi një gjykatë izraelite lejoi kthimin dhe vendbanimin e tyre pas dëbimit të tyre me forcë më 4 korrik mes një serie sulmesh të dhunshme të kolonëve të paligjshëm. Sipas statistikave zyrtare, 38 komunitete beduine në Bregun Perëndimor të pushtuar janë zhvendosur në gjashtë muajt e parë të vitit 2025 për shkak të dhunës në rritje të kolonëve.

Që nga fillimi i luftës gjenocidale të Izraelit në Rripin e Gazës në tetor 2023, të paktën 1.011 palestinezë janë vrarë dhe më shumë se 7.000 janë plagosur në Bregun Perëndimor nga forcat izraelite dhe kolonët e paligjshëm, sipas Ministrisë palestineze të Shëndetësisë.

Në një mendim historik korrikun e vitit të kaluar, Gjykata Ndërkombëtare e Drejtësisë e shpalli pushtimin e territorit palestinez nga Izraeli të paligjshëm. Ajo kërkoi evakuimin e të gjitha vendbanimeve kolone në Bregun Perëndimor dhe në Kudsin Lindor.