Izraeli ka zgjeruar ofensivën ushtarake në kampet e refugjatëve Tulkarem dhe Nur Shams në Bregun Perëndimor të pushtuar, thanë zyrtarët palestinezë të hënën, duke paralajmëruar se ky veprim është pjesë e një plani më të gjerë të zhvendosjes së detyruar, raporton Anadolu.

Guvernatori i Tulkaremit, Abdullah Kamil tha se ushtria izraelite i kishte informuar banorët se operacioni i saj në të dy kampet do të vazhdonte deri më 31 maj. "Vendimi pasqyron vendosmëri të qartë për të vazhduar këtë krim", tha Kamil në një deklaratë, duke iu referuar zhvendosjes së detyruar të banorëve, prishjes së shtëpive dhe shkatërrimit të infrastrukturës.

Ai tha se zgjatja do të përkeqësonte më tej kushtet humanitare me të cilat përballen banorët e të dy kampeve.

Ushtria izraelite zgjeroi ofensivën e saj në Tulkarem dhe Nur Shams më 27 janar, gjashtë ditë pasi nisi një operacion ushtarak në kampin e refugjatëve Jenin.

Departamenti i Çështjeve të Refugjatëve i Organizatës Çlirimtare Palestineze e dënoi vendimin, duke e përshkruar atë si "një episod të ri në agresionin e vazhdueshëm" kundër kampeve të refugjatëve palestinezë. Departamenti tha se zgjatja vjen në kuadër të "një politike zhvendosjeje të detyruar dhe shkatërrimi sistematik" të ndjekur nga Izraeli kundër palestinezëve.

Ai shtoi se shënjestrimi i Tulkaremit dhe Nur Shamsit është pjesë e një plani më të gjerë izraelit që synon kampet e refugjatëve palestinezë si simbole të gjalla të Nakbës.

Departamenti i bëri thirrje bashkësisë ndërkombëtare, Kombeve të Bashkuara, Këshillit të Sigurimit dhe Këshillit të të Drejtave të Njeriut që të veprojnë menjëherë për të ndaluar operacionin izraelit dhe për të siguruar mbrojtje ndërkombëtare për palestinezët.

Që nga 8 tetori 2023, agresionet izraelite në Bregun Perëndimor kanë vrarë 1.138 palestinezë, kanë plagosur rreth 11.700 të tjerë dhe kanë çuar në rreth 22 mijë arrestime.