Predikuesi i xhamisë Al-Aksa në Kudsin Lindor, Sheikh Ikrime Sabri, u paraqit në një gjykatë izraelite sot me akuzën e "nxitjes", raporton Anadolu.

Akuzat, të ngritura nga prokurorët izraelitë në gusht 2024, lidhen me dy fjalime ngushëllimi që predikuesi mbajti në vitin 2022 si dhe me fjalimin e tij për ish-kreun e Hamasit, Ismail Haniyeh, i cili u vra në kryeqytetin iranian në vitin 2024.

Një aktakuzë kundër imamit u lexua gjatë seancës gjyqësore të së martës në Gjykatën e Magjistraturës në Kuds. Predikuesi 87-vjeçar mbërriti në gjykatë në një karrocë me rrota, së bashku me avokatët e tij dhe disa mbështetës palestinezë.

Avokati mbrojtës, Khaled Zaharia më parë i tha Anadolu-t se seanca ishte procedurale, duke i quajtur akuzat kundër imamit "të fabrikuara". "Ne do t'i kërkojmë gjykatës prova të mëtejshme që besojmë se janë të nevojshme për të hedhur poshtë këtë aktakuzë", tha ai.

"Aktakuza përfaqëson një zgjatim të politikave të pushtimit të persekutimit politik racist kundër Sheikh Sabriut dhe figurave të tjera të Kudsit për të kufizuar rolin e tij dhe për të ndikuar në fjalimet e tij", shtoi Zaharia.

Avokati tha se Izraeli nëpërmjet gjyqit të imamit të xhamisë Al-Aksa "shënjestron gjithçka që Sheikh Sabri mishëron si një figurë e shquar fetare në Kuds".

Zaharia tha se predikuesi po përballet me presion të vazhdueshëm nga autoritetet izraelite, "së bashku me një fushatë të ashpër nxitjeje të nisur nga grupe ekstremiste të krahut të djathtë që bënë thirrje hapur për shënjestrimin dhe vrasjen e tij".

Pas leximit të aktakuzës, gjykata vendosi të mbajë një seancë tjetër gjyqësore për predikuesin e xhamisë më 6 janar. Në gusht 2024, policia izraelite i ndaloi Sheikh Sabriut të hynte në xhaminë Al-Aksa për 6 muaj për shkak të ngushëllimeve të tij për vdekjen e Haniyeh-s.

Autoritetet izraelite kanë marrë vazhdimisht masa kundër imamit palestinez për shkak të predikimeve të tij në mbështetje të Gazës, së bashku me nxitjen e vazhdueshme kundër tij nga zyrtarët në Tel Aviv, përfshirë ministrin e Sigurisë Kombëtare Itamar Ben-Gvir dhe ministrin e Brendshëm Moshe Arbel.