Izraeli ka filluar mobilizimin e 100 mijë rezervistëve ndërsa përgatitet të zgjerojë ofensivën e tij të vazhdueshme përtej Iranit dhe Libanit, thanë sot mediat izraelite, transmeton Anadolu.

Njësitë e inteligjencës ushtarake kanë nisur një thirrje rezervë si pjesë e përgatitjeve për "skenar shtesë operacionesh dhe një zgjerim të luftës", tha faqja e internetit e lajmeve "Walla".

Ushtria izraelite tha të dielën se po përgatitej të mobilizonte rreth 100 mijë rezervistë që ishin thirrur për të përforcuar të gjithë sektorët në kuadër të operacionit "Roaring Lion", emri i koduar i ofensivës së saj të vazhdueshme kundër Iranit.

Ushtria sot herët tha se ka nisur një "betejë ofensive" kundër grupit libanez Hezbollah në Liban.

Sulmet ajrore izraelite shënjestruan periferitë jugore të Bejrutit dhe zonat në Libanin jugor, duke vrarë 31 persona dhe duke plagosur 149 të tjerë, sipas Ministrisë së Shëndetësisë së Libanit.

Hezbollah tha sot se kishte qëlluar me raketa dhe dronë një bazë ushtarake izraelite në përgjigje të sulmeve pothuajse të përditshme nga Tel Avivi në Liban dhe vrasjes së udhëheqësit suprem të Iranit Ali Khamenei.

Që nga mëngjesi i së shtunës, Izraeli dhe SHBA-ja kanë kryer sulme kundër Iranit që kanë vrarë qindra njerëz, përfshirë Khamenein dhe zyrtarë të lartë.

Teherani është përgjigjur duke lëshuar raketa dhe dronë në Izrael si dhe bazat dhe interesat amerikane në disa vende të Gjirit.

Washingtoni dhe Tel Avivi e akuzojnë Teheranin se ndjek programe bërthamore dhe raketore që kërcënojnë Izraelin dhe aleatët e SHBA-së në rajon. Irani thotë se programi i tij bërthamor është paqësor dhe se nuk kërkon të prodhojë armë bërthamore.