Qendrat e votimit në Izrael janë mbyllur, ndërkohë që sipas autoriteteve zgjedhore regjistruan pjesëmarrjen më të lartë të votuesve për zgjedhjet e përgjithshme që nga viti 1999, transmeton Anadolu Agency (AA).

Pjesëmarrja e lartë erdhi në zgjedhjet e pesta të përgjithshme të vendit në më pak se katër vite. Qendrat e votimit u mbyllën në orën 22:00.

Komisioni Qendror i Zgjedhjeve tha se deri në orën 20:00 pjesëmarrja e votuesve ishte 66,3 për qind, me pothuajse 4.5 milionë njerëz që kishin shfrytëzuar të drejtën e tyre të votës.

Rreth 6.7 milionë votues kishin të drejtë të votojnë në zgjedhjet e sotme.

Pavarësisht pjesëmarrjes së lartë, Partia Fronti Demokratik për Paqe dhe Barazi tha se pjesëmarrja e votuesve arab ishte e ulët. Megjithatë, nuk u dha ndonjë shifër e saktë.

Derisa ish-kryeministri Benjamin Netanyahu synon të kthehet në pushtet, sondazhet tregojnë se partia e tij e krahut të djathtë ‘Likud’ mund të sigurojë 60 vende nga gjithsej 120 vende të parlamentit, një më pak nga një shumicë e plotë.

Partia ‘Yesh Atid’ e kryeministrit Yair Lapid parashikohet të përfundojë e dyta në një garë të ngushtë.

Rezultatet e zgjedhjeve pritet të shpallen nesër.