Ish-presidenti i SHBA-së, Barack Obama tha se nuk ka prova që alienët kanë kontakt me Tokën, duke sqaruar se nuk ka parë asnjë provë të tyre, transmeton Anadolu.

Deklarata erdhi pas bisedës së Obamës me prezantuesin amerikan të podkasteve, Brian Tyler Cohen, ku ai deklaroi se alienët "janë të vërtetë".

"Ata janë të vërtetë, por unë nuk i kam parë", tha ai në podkastin e publikuar të shtunën, duke iu përgjigjur pyetjes në lidhje me jashtëtokësorët.

"Ata nuk po mbahen në Zonën 51. Nuk ka asnjë strukturë nëntokësore, përveç nëse ekziston ky konspiracion i madh dhe ata e fshehën atë nga presidenti i SHBA-ve", tha Obama.

Megjithatë, pasi u përball me një reagim publik, Obama lëshoi ​ deklaratë në rrjetet sociale amerikane, Instagram, duke thënë se ai "po përpiqej të qëndronte me frymën e raundit të shpejtësisë".

"Statistikisht, universi është aq i gjerë sa ka shumë mundësi që të ketë jetë atje jashtë. Por, distancat midis sistemeve diellore janë aq të mëdha saqë shanset që të na kenë vizituar alienët janë të ulëta, dhe unë nuk pashë asnjë provë gjatë presidencës sime që jashtëtokësorët të kenë pasur kontakt me ne. Vërtet!".

Zona 51 është një strukturë shumë e klasifikuar e Forcave Ajrore Amerikane e vendosur në Liqenin Groom në Nevadën jugore. Ndërsa ka qenë prej kohësh subjekt i teorive konspirative që përfshijnë jashtëtokësorë, funksioni i saj i vetëm i njohur zyrtarisht është testimi i avionëve.