Irlanda planifikon të përdorë presidencën e saj të ardhshme të Këshillit të Bashkimit Evropian (BE) për të ndihmuar në riparimin e marrëdhënieve të tensionuara transatlantike dhe për të promovuar bashkëpunim më të ngushtë BE-NATO, transmeton Anadolu.

Sipas një dokumenti konfidencial të siguruar nga "The Irish Times", agjenda parashikon angazhim për ndërtimin e lidhjeve tregtare "më ambicioze dhe reciprokisht të dobishme" midis BE-së dhe SHBA-së, në sfondin e tensioneve pas tarifave të njëanshme të presidentit Donald Trump dhe komenteve të tij për Grenlandën.

Irlanda pritet të marrë presidencën e radhës të Këshillit të BE-së në muajin korrik deri në fund të vitit, duke kryesuar takime, ndërmjetësuar kompromise mes shteteve anëtare dhe negociuar qëndrime të përbashkëta. Hera e fundit që vendi e mbajti këtë rol ishte në vitin 2013.

Megjithëse presidenca 6-mujore nuk e dikton agjendën e BE-së, ajo mund të ndikojë në prioritetet. Irlanda synon të pozicionohet si urë lidhëse mes Brukselit dhe Washingtonit dhe të nxisë një "marrëdhënie transatlantike pozitive dhe reciprokisht të dobishme".

Dokumenti konfidencial, i shpërndarë ndërmjet departamenteve qeveritare, e përshkruan Evropën si duke u përballur me një "situatë ndërkombëtare sigurie në përkeqësim", të nxitur nga pushtimi rus i Ukrainës dhe rritja e tensioneve globale.

Mbrojtja dhe siguria pritet të zënë vend qendror. Irlanda do të mbështesë përpjekjet për forcimin e industrisë evropiane të mbrojtjes, avancimin e "bashkëpunimit gjithëpërfshirës dhe reciprokisht të dobishëm BE-NATO", zhvillimin e projekteve të përbashkëta dhe kundërvënien ndaj kërcënimeve hibride.

Lufta e Rusisë në Ukrainë do të mbetet prioriteti kryesor i politikës së jashtme të bllokut, me fokus "përcaktues" në sigurimin që Ukraina "të ketë çfarë i nevojitet për t'u mbrojtur". Presidenca gjithashtu do të ruajë vëmendjen ndaj kushteve humanitare në Gaza dhe përpjekjeve për mbajtjen e armëpushimit.