Irani ka bërë të ditur se sulmi i fundit i Izraelit në centralin bërthamor Fordow pranë qytetit Qom ka shkaktuar vetëm dëme të vogla dhe ka rezultuar në ndonjë ndotje bërthamore, transmeton Anadolu.

Duke folur për Agjencinë e Lajmeve të Studentëve Iranianë (ISNA), zëdhënësi i Organizatës së Energjisë Atomike të Iranit, Behrouz Kamalvandi, dha përditësime mbi gjendjen e centraleve bërthamore të vendit pas sulmit.

“Nuk ka dëme të konsiderueshme në zonat e shënjestruara në Fordow. Ne e kishim parashikuar një skenar të tillë dhe veçse kishim zhvendosur një sasi të konsiderueshme pajisjesh dhe materialesh jashtë zonës”, tha Kamalvandi.

Ai theksoi se si rezultat nuk ka pasur dëme në shkallë të gjerë dhe “absolutisht nuk ka asnjë shqetësim në lidhje me ndotjen radioaktive”.

Kamalvandi gjithashtu konfirmoi se nuk pati viktima në asnjë central bërthamor në të gjithë vendin.

“Ka pasur incidente të kaluara ku industria jonë bërthamore është dëmtuar, por ne e rindërtuam atë çdo herë, edhe më të fortë se më parë”, tha ai.

Në orët e para të së premtes, forcat izraelite sulmuan Iranin, duke goditur objekte bërthamore dhe raketore, si dhe duke vrarë të paktën 104 persona, përfshirë komandantë të lartë ushtarakë dhe shkencëtarë dhe duke plagosur rreth 380 persona të tjerë.

Sipas raporteve, Irani u përgjigj me raketa balistike që shënjestruan disa zona në të gjithë Izraelin, duke vrarë të paktën tre persona dhe duke plagosur mbi 170 të tjerë.