Korpusi i Gardës Revolucionare Islamike (IRGC) e Iranit tha sot se ka kryer valë të re sulmesh me dronë që kanë shënjestruar baza ushtarake dhe logjistike të lidhura me SHBA-në në Kuvajt, Arabinë Saudite dhe Bahrein, transmeton Anadolu.

Sipas raportimit nga agjencia gjysmëzyrtare e lajmeve Tasnim, IRGC tha në një deklaratë se vala e 82-të e operacionit të saj "True Promise 4" nisi në mëngjes dhe goditi objektiva të paracaktuara, përfshirë bazën "Arifjan" në Kuvajt, "Al-Kharj" në Arabinë Saudite dhe bazën "Sheikh Isa" në Bahrein.

Ajo tha se hakmarrja erdhi pas sulmeve në qytetin jugperëndimor të Iranit, Khorramshahr. Deklarata pretendon se në shënjestër ishin objektet logjistike të mbrojtjes amerikane, njësitë e magazinimit të karburantit, hangarët e dronëve MQ-9 dhe sistemet e komunikimit satelitor.

Operacioni u krye duke përdorur municione të varura dhe u "ekzekutua me sukses" dhe se valë të tjera janë duke vazhduar, thuhet më tej.

I gjithë rajoni i Lindjes së Mesme është në gatishmëri që kur SHBA-ja dhe Izraeli nisën ofensivë të përbashkët kundër Iranit më 28 shkurt, duke vrarë deri më tani mbi 1.340 njerëz, përfshirë ish-liderin suprem, Ali Khamenei.

Teherani është kundërpërgjigjur me sulme me dronë dhe raketa që kanë shënjestruar Izraelin, së bashku me Jordaninë, Irakun dhe vendet e Gjirit që strehojnë asete ushtarake amerikane, duke shkaktuar viktima dhe dëme në infrastrukturë ndërsa kanë prishur tregjet dhe aviacionin global.