Irani tha se kalimi detar përmes Ngushtica e Hormuzit do t’u nënshtrohet rregullave të reja të vendosura nga Teherani, duke shtuar se u ka përcjellë ndërmjetësve kushtet e tij të lidhura me luftën, transmeton Anadolu.

Ebrahim Azizi, kreu i Komisionit të Sigurisë Kombëtare të parlamentit iranian, tha në rrjetin social amerikan X se kalimi përmes ngushticës tani do të varet nga kushtet e Iranit, duke deklaruar se periudha disadekadëshe e asaj që ai e përshkroi si “mikpritje” ka përfunduar.

Veçmas, zëdhënësi i Ministrisë së Jashtme, Esmail Baghaei tha se konflikti ka ndikuar drejtpërdrejt në sigurinë rajonale, përfshirë Ngushticën e Hormuzit, Gjirin Persik dhe Detin e Omanit, duke paralajmëruar për pasoja më të gjera për ekonominë globale.

Në deklarata për agjencinë e lajmeve Yonhap të Koresë së Jugut, Baghaei tha se anijet që u përkasin palëve joarmiqësore mund të vazhdojnë të kalojnë përmes ngushticës pas koordinimit të nevojshëm me autoritetet iraniane, duke theksuar se masat synojnë të sigurojnë kalim të sigurt.