Irani dhe Rusia do të zhvillojnë stërvitje të përbashkët detare të enjten në Gjirin e Omanit dhe në veri të Oqeanit Indian, tha një komandant detar iranian, transmeton Anadolu.

Komandanti detar iranian, kapiten Hassan Maqsoudlou tha se stërvitja e kombinuar detare e Marinës së Republikës Islamike të Iranit dhe Marinës së Federatës Ruse do të zhvillohet në Gjirin e Omanit dhe në rajonin verior të Oqeanit Indian, sipas agjencisë zyrtare iraniane të lajmeve IRNA.

"Stërvitja synon të zgjerojë bashkëpunimin e përbashkët detar dhe të forcojë koordinimin midis dy marinave në planifikimin dhe kryerjen e operacioneve të kombinuara", tha Maqsoudlou.

Mbajtja e stërvitjes së bashku me stërvitje të tjera nga forcat e armatosura të Iranit pasqyron vëmendjen e të dy vendeve ndaj zhvillimeve në Gjirin e Omanit dhe në Oqeanin Indian dhe demonstron angazhimin e tyre për të rritur bashkëpunimin detar, duke luftuar unilateralizmin dhe duke mbështetur sigurinë tregtare detare në rajon, raportoi IRNA.

Komandanti i Forcës Detare të Rusisë, kapiten Alexey Sergeev tha: "Ne jemi të gatshëm të zhvillojmë stërvitje të përbashkëta në çdo rajon". Stërvitjet iraniano-ruse vijnë ndërsa Korpusi i Gardës Revolucionare Islamike (IRGC) e Iranit filloi një stërvitje ushtarake në Ngushticën e Hormuzit të hënën, mes tensioneve me SHBA-në.

Një deklaratë nga divizioni i marrëdhënieve me publikun i IRGC-së tha se stërvitja "Kontrolli i Mençur i Ngushticës së Hormuzit" synon të vlerësojë gatishmërinë operacionale të forcave të saj detare.