Indonezia kritikoi ashpër Izraelin për ligjin që vendos dënimin me vdekje për të burgosurit palestinezë, duke kërkuar ndërhyrjen e OKB-së, transmeton Anadolu.

Duke dënuar fuqimisht miratimin nga Parlamenti izraelit të legjislacionit që vendos dënimin me vdekje për të burgosurit palestinezë, Ministria e Jashtme indoneziane tha: "Një politikë e tillë është e papranueshme dhe minon ndjenjën e drejtësisë si dhe vlerat universale humanitare".

"Ligji është shkelje e rëndë e të drejtave ndërkombëtare të njeriut dhe ligjit humanitar, veçanërisht Konventës së Katërt të Gjenevës si dhe Paktit Ndërkombëtar për të Drejtat Civile dhe Politike, e cila garanton të drejtën për jetë dhe të drejtën për një gjykim të drejtë", tha ministria për Anadolu.

Knesseti, asambleja legjislative e Izraelit, miratoi ligjin kontrovers të hënën në mbrëmje me një votim prej 62-48. Kryeministri izraelit Benjamin Netanyahu gjithashtu votoi në mbështetje të tij.

Sipas ligjit, ekzekutimet do të kryhen me varje, të kryera nga rojet e burgut të emëruar nga Shërbimi i Burgjeve Izraelite. Personat e përfshirë duhet të kenë anonimitet dhe imunitet ligjor.

Xhakarta i bëri thirrje Izraelit të revokojë menjëherë legjislacionin dhe të ndërpresë të gjitha veprimet që bien ndesh me ligjin ndërkombëtar si dhe të sigurojë mbrojtjen e të drejtave themelore të popullit palestinez, përfshirë të ndaluarit.

"Indonezia i bën thirrje bashkësisë ndërkombëtare, në veçanti OKB-së të marrë masa të forta për të siguruar llogaridhënien dhe mbrojtjen e popullit palestinez. Indonezia riafirmon mbështetjen e saj të plotë për luftën e popullit palestinez për të arritur pavarësinë me Kudsin Lindor si kryeqytetin e tij", thuhet në deklaratë.