I dyshuari i akuzuar se ka qëlluar dy anëtarë të Gardës Kombëtare në Washington, DC, duke vrarë njërin prej tyre, deklaroi të martën se është i pafajshëm për vrasje dhe një sërë akuzash për sulm dhe armë zjarri, sipas raportimeve të medias, transmeton Anadolu.

Rahmanullah Lakanwal, 29-vjeç u paraqit virtualisht në Gjykatën e Lartë të Washington, DC nga shtrati i tij i spitalit, ku ai dha deklaratën e tij të pafajësisë për disa akuza, duke përfshirë vrasje të shkallës së parë, sulm me qëllim vrasjeje, posedim të një arme zjarri dhe posedim të një arme zjarri gjatë një krimi dhune.

Lakanwal akuzohet për vrasjen e oficeres Sarah Beckstrom, 20-vjeç, dhe plagosjen e rreshterit Andrew Wolfe, 24-vjeç, javën e kaluar, ndërsa ata ishin në patrullim pranë Shtëpisë së Bardhë si pjesë e vendosjes së tyre përmes Gardës Kombëtare të Virxhinias Perëndimore për të ndihmuar në mbrojtjen e kryeqytetit të vendit. Beckstrom vdiq dhe Wolfe mbetet në gjendje kritike.

Gjyqtarja e Gjykatës së Lartë, Renee Raymond tha në gjykatë se çështja kundër Lakanwal është "jashtëzakonisht e fortë".

"Ka pamje filmike të tij duke pritur në mes të ditës i armatosur, dhe pastaj, pasi pa një kontingjent oficerësh të zbatimit të ligjit, përfshirë anëtarët e Gardës Kombëtare të vrarë dhe të plagosur, ai shkoi në drejtim të tyre dhe filloi të qëllonte mbi ta", tha Raymond. "Kjo vërteton forcën e argumenteve të qeverisë", shtoi ajo.

Lakanwal, një shtetas afgan i cili më parë ka punuar për një degë të Agjencisë Qendrore të Inteligjencës (CIA) të qeverisë amerikane, u deklarua se është i pafajshëm për të gjitha akuzat. Ai aktualisht po mbahet në burg pa garanci.

Autoritetet nuk kanë publikuar ende një motiv për të shtënat.