STAMBOLL (AA) – Ambasadori i SHBA-së në Turqi dhe i dërguari special për Sirinë, Tom Barrack vlerësoi Katarin për financimin e një iniciative për gazin natyror në Siri, e cila po punon për t'u rikuperuar nga më shumë se një dekadë luftë civile, transmeton Anadolu.

"Falënderime të përzemërta për Katarin për financimin e plotë të një iniciative jetësore për gazin për Sirinë", tha Barrack në X.

"Nga (e shtuna) 2 gusht, gazi natyror i Azerbajxhanit, i furnizuar nëpërmjet Turqisë, do të furnizojë me energji 800 MW (megavat), duke ndriçuar 5 milionë shtëpi", tha ai duke e quajtur këtë veprim një "hap të thellë drejt lehtësimit dhe stabilitetit në Siri në një moment kritik. Një demonstrim i guximshëm nga Katari dhe lidershipi i tij i partneritetit dhe miqësisë".