Holandë, mbahet aktiviteti i "Ditës Kombëtare të Tulipanëve"

Me rastin e fillimit të sezonit të tulipanëve në Holandë u mbajt aktiviteti i "Ditës Kombëtare të Tulipanëve", raporton Anadolu Agency (AA).

Aktiviteti i "Ditës Kombëtare të Tulipanëve" që zhvillohet çdo vit të shtunën e tretë të muajit janar u mbajt në Sheshin e Muzeve.

E ftuara e nderit e aktivitetit i cili këtë vit u mbajt me temën "Tipik Holandez" ishte patinatorja holandeze Irene Schouten, babai i së cilës është gjithashtu një prodhues tulipani dhe e cila ka fituar medaljen e artë duke thyer rekordin olimpik 20-vjeçar me një kohë prej 3:56.93 në patinazhin e shpejtësisë 3.000 metra për femra në Lojërat Olimpike Dimërore të Pekinit 2022.

Që në orët e para të mëngjesit mijëra njerëz u vendosën në radhë në shesh për të marrë tulipanë nga më shumë se 200 mijë tulipanë me ngjyra të ndryshme që u ekspozuan nga prodhuesit e tulipanëve dhe që u shpërndanë pa pagesë.

Anita Darienarita, e cila tha se ka ardhur nga Indonezia tek të njohurit e saj që jetojnë në Holandë mëngjesin e sotëm për këtë aktivitet tha: "Po pres këtu prej rreth 4 orësh. Ky është një aktivitet që ndodh një herë në vit dhe jam shumë me fat që kam mundur të përputhem me këtë".

Ndërsa Jessie Bart, një nga organizatorët e programit shprehu kënaqësinë për interesin intensiv të vizitorëve. "Ne e festojmë sot si ditën kombëtare të tulipanëve për njohjen e tulipanëve", tha ajo.

Meryem Uittenbogaard, një nga vizitorët ka thënë se ndodhet këtu me qëllimin për të marrë tulipan për fqinjin e saj që nuk mund të marrë pjesë në aktivitet për shkak se ka vështirësi në të ecur.

Vizitorët të cilët mbushën qeset e tyre të letrës me tulipanë shumëngjyrësh, bënë foto në mesin e luleve në shesh.

Tulipani, i cili identifikohet me Holandën, edhe pse atdheu i saj është Türkiye, ka një rëndësi të madhe për ekonominë e vendit. Prodhuesit holandezë të cilët mbjellin më shumë se 4 miliardë bimë tulipani në vit, eksportojnë gati gjysmën e tyre.