Grupi Hezbollah i Libanit tha se kreu një seri sulmesh me raketa dhe artileri që synonin trupat dhe infrastrukturën izraelite në veri të Izraelit dhe zonat kufitare, transmeton Anadolu.

Në deklarata të veçanta, Hezbollahu tha se qëlloi me raketa infrastrukturën në zonën Kiryat Ata në lindje të qytetit të pushtuar të Haifës. Hezbollah tha gjithashtu se shënjestroi me raketa tubimet e ushtarëve dhe automjeteve izraelite në vendbanimet Metula dhe Malkia në veri të Izraelit.

Grupi shtoi se bombardoi ushtarët dhe automjetet izraelite me zjarr artilerie në kodrën Jnijal pranë qytetit jugor libanez Qantara. Më tej tha se një tjetër sulm me raketa shënjestroi një tubim ushtarësh dhe automjetesh izraelite në zonën Sadr pranë qytetit jugor libanez Aita al-Shaab.

Më vonë, Hezbollahu njoftoi se shënjestroi me breshëri raketash tubimet e ushtarëve izraelitë në vendbanimet Yir'on dhe Al-Malkiya, duke e çuar numrin total të sulmeve të tij sot në 12.

Grupi libanez tha se dronët e tij shënjestruan gjithashtu vendbanimin Even Menachem në veri të Izraelit.

Izraeli ka goditur Libanin me sulme ajrore dhe ka nisur ofensivë tokësore në jug që nga një sulm ndërkufitar nga Hezbollahu më 2 mars. Autoritetet libaneze thonë se 1.318 persona janë vrarë që atëherë ndërsa 3.935 të tjerë janë plagosur në sulmet e Izraelit.