Hamasi dënoi sulmin e ushtrisë izraelite në shkollën "Fahmi al-Jarjawi" në veri të Gazës, ku palestinezët e zhvendosur po strehoheshin, duke thënë se Izraeli po përpiqet të mbulojë masakrat e civilëve me gënjeshtra dhe deklarata zvarritëse, transmeton Anadolu.

Hamasi dënoi me fjalët më të ashpra sulmet e Izraelit ndaj civilëve të zhvendosur në Rripin e Gazës.

Në deklaratë thuhet se "Sulmet ndaj shkollës 'Fahmi al-Jarjawi' dhe shtëpisë që i përkiste familjes Abdurabbu në Jabalia ishin tregues i qartë i politikës së djegies dhe shkatërrimit të zbatuar nga forcat pushtuese dhe qëllimit të tyre për të evakuuar Gazën".

"Izraeli kishte kryer masakra duke synuar civilët, veçanërisht gratë dhe fëmijët. Ky sulm është tregues se politika gjenocidale e Izraelit pushtues vazhdon dhe se civilët po shënjestrohen sistematikisht", thuhet më tej.

"Ne paralajmërojmë kundër përpjekjeve të pushtuesit për t'iu shmangur përgjegjësisë për vrasjen e nëntë fëmijëve nga familja Nejjar duke pretenduar në mënyrë të rreme se nuk ka informacion përkatës dhe duke pretenduar fillimin e hetimit", thuhet në deklaratë.

Hamasi thekson se "Struktura fashiste e qeverisë izraelite po rrit krimet e saj kundër njerëzimit, duke përfituar nga mungesa e parandalimit ndërkombëtar. Ne i bëjmë thirrje Këshillit të Sigurimit të Kombeve të Bashkuara, Gjykatës Ndërkombëtare Penale dhe komunitetit ndërkombëtar të ndalojnë gjenocidin në Gaza, t'i japin fund rrethimit dhe të sigurojnë flukse të pakushtëzuara të ndihmës humanitare".

Në një sulm ajror të kryer nga ushtria izraelite në orët e para të mëngjesit në shkollën "Fahmi al-Jarjawi" ku po strehoheshin palestinezët në veri të Rripit të Gazës, dhjetëra njerëz u vranë dhe shumë të tjerë u plagosën.

Në pamjet e publikuara shiheshin tenda që digjeshin rreth shkollës, shumë fëmijë të vrarë ose të plagosur dhe civilë që përpiqeshin t'u shpëtonin flakëve.