Hamasi ka bërë thirrje për protesta dhe aktivitete në shkallë të gjerë përgjatë tre ditëve për të ndaluar gjenocidin e Izraelit në Rripin e Gazës, transmeton Anadolu.

Në një deklaratë me shkrim, Hamasi tha se Izraeli ka rritur dozën e masakrave në Gaza, ka shënjestruar vendbanimet, strehimoret, tendat dhe spitalet, dhe ka fshirë plotësisht nga regjistrat e popullsisë shumë familje.

"Kryeministri izraelit Benjamin Netanyahu ka përdorur bllokadën dhe urinë si armë për të thyer vullnetin e popullit palestinez", thuhet në deklaratën ku bëhet e ditur se edhe bota është gjithashtu e paaftë që t'i thotë ndal këtyre "krimeve të luftës".

Duke iu drejtuar njerëzve të lirë të botës si dhe vendeve arabe dhe islame, deklarata bën thirrje për ushtrimin e presionit mbi Izraelin përmes protestave dhe aktiviteteve në shkallë të gjerë që do të mbahen në datat 16-17-18 maj.