TIRANË (AA) – Gjitari detar Dugongu, i klasifikuar si "specie e rrezikuar nga zhdukja" nga Unioni Ndërkombëtar për Ruajtjen e Natyrës (IUCN), u filmua në Detin e Kuq nga regjisori nënujor dhe producenti i dokumentarëve Tahsin Ceylan, raporton Anadolu.

Të njohur për qetësinë e tyre, dugongët, gjitarë barngrënës, ushqehen me livadhe deti, të cilat luajnë rol jetësor në ekosistemin detar. Këta gjitarë gjigantë detarë, të cilët mund të arrijnë afërsisht 3 metra gjatësi dhe të peshojnë deri në 400 kilogramë, janë ndër speciet me tregti ndërkombëtare të kufizuar në nivel global.

Edhe pse të mbrojtur ligjërisht në shumë vende, shkatërrimi i habitatit, vdekshmëria e lidhur me peshkimin dhe gjuetia e paligjshme kërcënojnë mbijetesën e dugongut.

Për të mbrojtur këtë specie, e cila mund të jetojë mesatarisht 70 vjet dhe është e dallueshme për shkallën e saj të ngadaltë të riprodhimit, në vende të ndryshme kryhen punime për restaurimin e habitatit, zgjerimin e zonave të mbrojtura dhe për të monitoruar rrjetat e peshkimit.

Ekspertët theksojnë se dugongët nuk janë vetëm specie që ka nevojë për mbrojtje, por edhe një pjesë e domosdoshme e ekuilibrit të ekosistemit detar.