Gjermania arrestoi tre persona të dyshuar për spiunazh për Kinën, transmeton Anadolu.

Të tre shtetasit gjermanë krijuan një kompani për të bashkëpunuar me universitetet për të marrë informacion mbi teknologjinë e ndjeshme ushtarake, tha në një deklaratë Zyra e Prokurorit Federal.

"Të dyshuarit dyshohen se punojnë për një shërbim inteligjent kinez", thanë prokurorët, duke shtuar se aktivitetet e tyre të spiunazhit nisën para qershorit 2022.

Sipas hetuesve, në kohën e arrestimit të tyre, të akuzuarit ishin në negociata të mëtejshme rreth projekteve kërkimore që mund të ishin të dobishme për zgjerimin e fuqisë luftarake detare të Kinës.

Të dyshuarit u akuzuan gjithashtu për blerjen e produkteve që ndërlidhen me ushtrinë dhe eksportimin e tyre në Kinë, në kundërshtim me ligjet dhe rregulloret e kontrollit të eksportit me përdorim të dyfishtë.

"I akuzuari bleu një lazer special nga Gjermania në emër dhe me pagesë nga shërbimi sekret kinez MSS dhe e eksportoi në Kinë pa autorizim", thanë prokurorët.

Të dyshuarit u arrestuan në qytetet perëndimore Dusseldorf dhe Bad Homburg, ndërsa policia kreu kontrolle në shtëpitë dhe vendin e tyre të punës, duke sekuestruar dokumente të ndryshme dhe pajisje elektronike.