BERLIN (AA) – Si pasojë e një shpërthimi në një godinë banimi në qytetin perëndimor gjerman Wuppertal, së paku 25 persona janë lënduar, ndërsa katër prej tyre janë në gjendje serioze, raporton Anadolu Agency (AA). 

Në njoftim thuhet se shpërthimi tronditi ndërtesën shumëkatëshe pak para mesnatës. Nga shpërthimi është shkatërruar papafingo e ndërtesës dhe tre kate kryesore, lajmëroi agjencia gjermane e lajmeve DPA.

Më pas shpërtheu zjarr në disa pjesë të ndryshme të ndërtesës, ndërsa zjarrfikësit kishin problem me fikjen e zjarrit, meqë disa pjesë të ndërtesës filluan të shemben. Zjarrfikësit shpëtuan katër persona të lënduar rëndë nga brendësia e ndërtesës dhe i dërguan në spital. Edhe 21 persona janë lënduar lehtë dhe transferuar në spitalin më të afërt.

Policia gjermane të dielën tha se ende përpiqen të fikin zjarrin dhe punojnë në zbulimin e shkakut të shpërthimit. Nuk ka përgjigje ndaj pyetjes nëse shpërthimi ka të bëjë me sulm terrorist.