STAMBOLL (AA) - Ministria palestineze e Shëndetësisë në Gaza njoftoi se 19 persona kanë vdekur nga uria në enklavën e rrethuar në 24 orët e fundit.

Munir al-Bersh, Drejtor i Përgjithshëm i Ministrisë së Shëndetësisë, duke folur për Anadolu, tha se 19 persona kanë vdekur nga uria në 24 orët e fundit dhe paralajmëroi se numri i vdekjeve nga uria mund të rritet.

Bersh deklaroi gjithashtu se 95 persona kanë vdekur ditën e fundit si rezultat i hapjes së zjarrit nga ushtarët izraelitë në të ashtuquajturat qendra të shpërndarjes së ndihmave.

Duke refuzuar thirrjet ndërkombëtare për armëpushim, ushtria izraelite ka kryer një ofensivë brutale në Gaza që nga 7 tetori 2023, duke vrarë mbi 59.000 palestinezë, shumica prej tyre gra dhe fëmijë. Bombardimet e pamëshirshme e kanë shkatërruar enklavën dhe kanë çuar në mungesë ushqimi dhe përhapje të sëmundjeve.

Nëntorin e kaluar, Gjykata Ndërkombëtare Penale lëshoi urdhërarreste për kryeministrin izraelit Benjamin Netanyahu dhe ish-ministrin e tij të Mbrojtjes Yoav Gallant për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në enklavën palestineze.