Presidenti francez, Emmanuel Macron, ka përshëndetur marrëveshjen Izrael-Hamas për fazën e parë të planit të armëpushimit në Gaza, duke theksuar se ajo sjell “shpresë të madhe”, transmeton Anadolu.

"Shpresë e madhe për pengjet dhe familjet e tyre, për palestinezët në Gaza dhe për rajonin," shkroi Macron në platformën sociale të kompanisë amerikane X.

"Unë përshëndes marrëveshjen e arritur mbrëmë për lirimin e pengjeve dhe armëpushimin në Gaza, si dhe përpjekjet e presidentit Trump, si dhe të ndërmjetësve Katarit, Egjiptit dhe Turqisë për ta arritur atë”, tha Macron.

Duke u bërë thirrje palëve që të "respektojnë në mënyrë strikte" kushtet e marrëveshjes, ai tha se "kjo marrëveshje duhet të shënojë fundin e luftës dhe fillimin e një zgjidhjeje politike bazuar në zgjidhjen me dy shtete”.

Ai gjithashtu shprehu gatishmërinë e Francës për të kontribuar në këtë qëllim dhe tha se çështja do të diskutohet më vonë gjatë ditës në Paris me partnerët ndërkombëtar të vendit.

Komentet e tij erdhën pasi Trump njoftoi se Izraeli dhe Hamasi kanë nënshkruar fazën e parë të një marrëveshjeje të propozuar nga SHBA-ja për Gazën.

Plani 20-pikësh, i njoftuar për herë të parë më 29 shtator, përfshin lirimin e të gjitha pengjeve izraelite në këmbim të të burgosurve palestinezë, një armëpushim, çarmatimin e Hamasit dhe rindërtimin e Gazës.

Që nga tetori i vitit 2023, sulmet izraelite kanë vrarë të paktën 67.200 palestinezë në enklavë, shumica prej tyre gra dhe fëmijë. Bombardimet e pamëshirshme e kanë kthyer Gazën praktikisht në të pabanueshme, duke çuar në uri dhe përhapjen e sëmundjeve.