Turqia ka ndërmarrë hapa për ta larguar terrorizmin si nga agjenda e vendit ashtu edhe ajo e rajonit nëpërmjet iniciativës së saj “Turqi pa terror”, i ka thënë presidenti Recep Tayyip Erdoğan homologut të Emirateve të Bashkuara Arabe, Sheikh Mohamed bin Zayed Al Nahyan, në një telefonatë sot, transmeton Anadolu.

Sipas një njoftimi nga Drejtoria turke e Komunikimeve, gjatë telefonatës, Erdoğan ka thënë se këto përpjekje do të vazhdojnë me vendosmëri.

Ndërkaq, Al Nahyan është shprehur se qëllimi i Ankarasë për një “Turqi pa terror” do të kontribuojë ndjeshëm në sigurinë rajonale dhe gjithashtu ka shprehur urimet e tij për një përfundim të suksesshëm të procesit.

Erdoğan ka theksuar gjithashtu se partneriteti strategjik midis Turqisë dhe Emirateve të Bashkuara Arabe ka dhënë rezultate pozitive në të gjitha fushat, duke vënë në dukje potencialin e madh midis dy vendeve, veçanërisht në industrinë e mbrojtjes dhe teknologjitë në zhvillim.

Presidenti turk ka shtuar se Ankaraja po monitoron nga afër negociatat e paqes midis Azerbajxhanit dhe Armenisë të nisura në Abu Dhabi dhe do të vazhdojë të mbështesë përpjekjet për të vendosur qetësi të qëndrueshme në Kaukaz.