Ekspertët e OKB-së paralajmëruan sot se kufizimet e Izraelit mbi operacionet humanitare në Gaza dhe Bregun Perëndimor po e përkeqësojnë krizën për gratë dhe vajzat, të cilat po përballen me dëme joproporcionale, transmeton Anadolu.

"Gratë dhe vajzat po vuajnë një pjesë joproporcionale të privimit, pasi qasja në ushqim, kujdes shëndetësor, strehim, ujë dhe kanalizime vazhdon të jetë në kolaps", thanë ekspertët në një deklaratë. Ata thanë se shtrëngimi i kufizimeve nga Izraeli mbi organizatat humanitare ka "thelluar një situatë tashmë katastrofike", me grupe të cenueshme më të prekura.

Rënia e sistemit të kujdesit shëndetësor të Gazës ka vënë jetën e grave në rrezik të menjëhershëm, theksuan ata, veçanërisht për shkak të ndërprerjeve në shërbimet e shëndetit të nënës dhe riprodhues. "Mohimi i aksesit në kujdesin shëndetësor të nënës dhe riprodhues në këto kushte vë jetë në rrezik të drejtpërdrejtë", paralajmëruan ekspertët, duke shtuar rreziqet për gratë shtatzëna dhe ato në situata të cenueshme.

Ata theksuan përkeqësimin e kushteve për vajzat, të cilat përballen me ekspozim në rritje ndaj urisë, sëmundjeve dhe ndërprerjes së arsimit. "Kur ndihma humanitare bllokohet, vajzat kanë më shumë gjasa të vuajnë nga uria, sëmundjet dhe ndërprerja e arsimit", thanë ata.

Ekspertët e OKB-së shtuan se mungesa e shërbimeve dhe mbrojtjes bazë po i ekspozon gratë dhe vajzat ndaj rreziqeve më të mëdha të dhunës dhe dëmit afatgjatë, duke thënë se ato detyrohen të kompensojnë mangësitë që rezultojnë përmes rritjes së punës së kujdesit të papaguar dhe strategjive të dëmshme të përballimit, "shpesh në kurriz të shëndetit dhe mirëqenies së tyre".

"Ndihma humanitare e ndjeshme ndaj gjinisë nuk është diskrecionare. Duke penguar aksesin në ndihmë, Izraeli po u mohon grave dhe vajzave mbrojtjen dhe mbështetjen që ato kanë të drejtë sipas ligjit ndërkombëtar", thonë ekspertët e OKB-së.