Gjermania do të dërgojë këtë javë 13 ushtarë në Grenlandë si pjesë e një misioni shumëkombësh zbulimi, njoftoi të mërkurën Ministria e Mbrojtjes e vendit, transmeton Anadolu.

Sipas një deklarate të ministrisë, një avion transportues A400M i Forcave Ajrore Gjermane do të niset të enjten në mëngjes për në Nuuk, kryeqytetin e Grenlandës, duke transportuar ekipin e zbulimit.

“Qëllimi është të shqyrtohen kushtet kornizë për kontribute të mundshme ushtarake në mbështetje të Danimarkës në garantimin e sigurisë në rajon, për shembull për aftësitë e mbikëqyrjes detare”, thuhet në deklaratë.

Dislokimi vjen pas një ftese nga Danimarka dhe do të përfshijë përfaqësues nga vende të tjera partnere evropiane, megjithëse ministria nuk specifikoi se cilat shtete do të marrin pjesë.

Misioni i zbulimit zhvillohet në një kohë të rritjes së tensioneve mes SHBA-së dhe evropianëve, pas komenteve të fundit të presidentit Donald Trump për Grenlandën dhe këmbënguljes së tij se ajo duhet të jetë “në duart e SHBA-së” për të përballuar kërcënimet nga Rusia dhe Kina.

Ministri i Jashtëm i Danimarkës, Lars Lokke Rasmussen, u tha gazetarëve të mërkurën, pas një vizite në Shtëpinë e Bardhë, se “nuk arritëm ta ndryshonim qëndrimin e SHBA-së” për Grenlandën.

“Për ne, idetë që nuk respektojnë integritetin territorial të Mbretërisë së Danimarkës dhe të drejtën e vetëvendosjes së popullit të Grenlandës janë, sigurisht, plotësisht të papranueshme”, tha ai.

Nënpresidenti amerikan JD Vance dhe Sekretari i Shtetit Marco Rubio u takuan me Rasmussenin dhe ministren e Jashtme të Grenlandës, Vivian Motzfeldt, mes interesit të vazhdueshëm të Trumpit për të marrë territorin autonom danez.