Ushtria izraelite raportoi se sirenat e sulmeve ajrore u dëgjuan sot në të gjithë Izraelin verior për shkak të "infiltrimit të mjeteve ajrore armiqësore", transmeton Anadolu.

Thuhet se miliona izraelitë në të gjithë vendin nxituan drejt strehimoreve ndërsa sirenat u dëgjuan, të shkaktuara nga raketat e lëshuara nga Irani.

Kanali 12 i Izraelit tha se sirenat që paralajmëronin për infiltrim të dyshuar të dronëve u dëgjuan në Nazareth dhe disa qytete përreth.

Forcat Ajrore Izraelite thanë më parë se kishin kapur një dron të lëshuar nga Irani gjatë natës, i cili aktivizoi sirenat e sulmeve ajrore në zona të shumta të Izraelit verior. Një dron i dytë u kap pak më vonë në Luginën e Jordanit.

Tensionet rajonale janë përshkallëzuar që nga e premtja, kur Izraeli nisi sulme ajrore në disa vende në të gjithë Iranin, përfshirë objekte ushtarake dhe bërthamore, duke e shtyrë Teheranin të nisë sulme hakmarrëse.

Autoritetet izraelite thanë se të paktën 24 persona janë vrarë dhe qindra të tjerë janë plagosur që atëherë në sulmet me raketa iraniane.

Ndërkohë, në Iran 585 persona janë vrarë dhe më shumë se 1.300 janë plagosur në sulmin izraelit, sipas raportimeve të medias iraniane.