Dy gazetarë u plagosën në një sulm ajror izraelit në jug të Libanit derisa po raportonin për një sulm ndaj një ure një ditë më parë, transmeton Anadolu.

Dëshmitarët thanë se dy gazetarët u “frikësuan” nga një goditje me dron që ra pranë tyre derisa po raportonin për dëmet e shkaktuara nga një sulm izraelit ndaj Urës Qasmiyeh mbi lumin Litani.

Ata shtuan se një tjetër sulm izraelit shënjestroi urën teksa dy reporterët po zhvillonin një transmetim të drejtpërdrejtë pranë vendit, duke i plagosur ata.

Agjencia shtetërore libaneze e lajmeve NNA i identifikoi dy gazetarët si korrespondentin e RS, Steve Sweeny dhe kameramanin e tij.

Ushtria izraelite ka përshkallëzuar sulmet ajrore në të gjithë Libanin ditët e fundit mes përplasjeve ndërkufitare me Hezbollahun, pavarësisht një marrëveshjeje armëpushimi që është në fuqi që nga nëntori 2024.

Sipas autoriteteve libaneze, të paktën 968 persona janë vrarë dhe 2.432 janë plagosur nga sulmet izraelite në të gjithë Libanin që nga 2 marsi.

Përshkallëzimi aktual pasoi një ofensivë të përbashkët SHBA-Izrael kundër Iranit, e cila ka vrarë rreth 1.300 persona që nga 28 shkurti. Teherani është kundërpërgjigjur me sulme me dronë dhe raketa që kanë shënjestruar Izraelin, si dhe Jordaninë, Irakun dhe vendet e Gjirit, të cilat sipas tij strehojnë “asete ushtarake amerikane”.