Tim Allan dha dorëheqje të hënën si drejtor i komunikimit i Kryeministrit britanik Keir Starmer, vetëm një ditë pasi shefi i tij i stafit dha dorëheqje për shkak të skandalit të Mandelson lidhur me zbulimet e reja për dosjen Epstein, transmeton Anadolu.

"Kam vendosur të tërhiqem për të lejuar ndërtimin e një ekipi të ri në Nr. 10", tha Allan në një deklaratë, sipas raportit të BBC-së.

"I uroj Kryeministrit (Starmer) dhe ekipit të tij çdo sukses", shtoi ai.

Dorëheqja e Allan erdhi vetëm një ditë pasi Morgan McSweeney dha dorëheqje si shef i stafit të Starmer për shkak të pasojave nga skandali i Peter Mandelson lidhur me zbulimet e reja për Epstein.

McSweeney pranoi të dielën se vendimi për të emëruar Mandelson si ambasador i MB-së në SHBA vitin e kaluar "ishte i gabuar".

Javën e kaluar, Starmer tha se ishte "i keqardhur" që i besoi "gënjeshtrave" të Mandelson dhe e emëroi atë ambasador në SHBA, ndërsa presioni ndaj tij vazhdoi pasi pranoi se kishte dijeni për lidhjet e Mandelson me të ndjerin dhe të dënuarin për krime seksuale Jeffrey Epstein.

Mandelson u shkarkua në shtator, por dosjet e reja mbi Epsteinin sugjeruan se ai kishte ndarë informacione konfidenciale me Epstein kur ishte sekretar biznesi në vitin 2009.

Mandelson gjithashtu dha dorëheqje nga Dhoma e Lordëve dhe nga Partia Laburiste.