Të paktën 90 protestues u arrestuan në një demonstratë në Londër në mbështetje të grupit të ndaluar aktivist “Palestine Action”, njoftoi policia të shtunën, transmeton Anadolu.

Arrestimet lidhen me protestën e organizuar nga “Defend Our Juries” në mbështetje të “organizatës së shpallur terroriste Palestine Action”, tha Policia Metropolitane në një deklaratë.

Ajo shtoi se protesta ka përfunduar dhe pjesëmarrësit janë larguar nga zona.

Protestuesit u mblodhën në “Tavistock Square”, ku mbanin flamuj palestinezë dhe pankarta, duke brohoritur slogane pro Palestinës.

Disa prej pankartave shkruanin: “E kundërshtoj gjenocidin, e mbështes Palestine Action”.

Grupi “Defend Our Juries” shkroi në platformën amerikane X se policia filloi menjëherë të arrestonte protestuesit që po mbanin në heshtje pankarta që, sipas tyre, kundërshtonin gjenocidin dhe ndalimin e “Palestine Action”.

“Protesta e sotme po zhvillohet në ‘Tavistock Square’, Londër — e njohur si kopshtet e paqes me memoriale kundër luftës. Hiqeni ndalimin”, shtoi grupi.

“Palestine Action” u shpall e ndaluar në korrik, sipas Ligjit për Terrorizmin të Mbretërisë së Bashkuar, një vendim që ka çuar në arrestimin e qindra protestuesve propalestinezë për mbajtje pankartash apo shprehje mbështetjeje për grupin.

Protestat e reja zhvillohen përpara dhe gjatë shqyrtimit gjyqësor që do të mbahet nga 25 deri më 27 nëntor, i cili mund të çojë në anulimin e shpalljes së “Palestine Action” si organizatë terroriste.

Që nga tetori 2023, ushtria izraelite ka vrarë gati 70.000 persona në Gaza, kryesisht gra dhe fëmijë, ka plagosur mbi 170.800 dhe e ka shndërruar enklavën në rrënoja. Sulmet u ndalën nën një marrëveshje armëpushimi që hyri në fuqi më 10 tetor.

Gjykata Penale Ndërkombëtare lëshoi urdhra arresti nëntorin e vitit të kaluar për kryeministrin izraelit Benjamin Netanyahu dhe ish-ministrin e tij të mbrojtjes Yoav Gallant për krime lufte dhe krime kundër njerëzimit në Gaza.

Izraeli përballet gjithashtu me një padi për gjenocid në Gjykatën Ndërkombëtare të Drejtësisë për luftën e tij në Gaza.